Бугарски европратеник: Секоја промена на европскиот консензус ќе ѝ даде право на Бугарија да стави вето за членството на Северна Македонија во ЕУ

Бугарскиот европратеник од редовите на ГЕРБ-СДС-ЕНП Илија Лазаров изјави дека секоја промена на европскиот консензус ќе ѝ даде право на Бугарија да стави вето на членството на Северна Македонија во Европската Унија. Во интервју за БГНЕС, тој го обвини европратеникот Томас Вајц дека работи под влијание на Христијан Мицкоски и Тимчо Муцунски и дека со своите постапки создава пропаганден шум.

„Кога аплицираш за еден клуб, треба да се однесуваш пристојно и да ги почитуваш правилата. Не можеш да влезеш, да кршиш прозорци, да ја шутираш масата и столовите и да се обидуваш да го наметнеш сопственото непристојно однесување“, изјави Лазаров.

Повод за разговорот е обидот за ревизија на европските услови за Северна Македонија преку извештајот на Вајц, кој предлага измена со која се доведува во прашање вториот протокол кон Договорот со Бугарија – дел од преговарачката рамка на ЕУ – и се поврзува почетокот на преговорите со впишувањето на Бугарите во Уставот.

Според Лазаров, координацијата меѓу Вајц и раководството во Скопје е очигледна, но тој смета дека станува збор за целосна зависност: „Тоа што тие го сакаат, секогаш влегува во неговиот нацрт-извештај.“

Тој потсети дека минатата година биле отфрлени предлози за вклучување на „многувековен идентитет“ и „многувековен јазик“ во извештајот, што, како што рече, предизвикало потсмев во Комисијата за надворешни работи (AFET). Лазаров го цитираше и шпанскиот европратеник Антонио Лопес, кој истакнал дека идентитетот и јазикот не се предмет за вакви европски документи.

„Сите 17 бугарски европратеници работевме едногласно и бугарската позиција беше прифатена – амандманите не поминаа“, рече тој, додавајќи дека биле испратени писма до претседателката на Европскиот парламент Роберта Мецола.

Во однос на актуелниот извештај, Лазаров истакна дека веќе има европски консензус прифатен од сите 27 земји членки, од тогашната влада на Северна Македонија и ратификуван во парламентот, поради што, според него, не треба повторно да се отвора.

Тој нагласи дека Бугарија треба да има единствена позиција меѓу сите институции и јасно да стави до знаење дека секоја промена на европскиот консензус ќе резултира со вето. „И за почетокот на преговорите и за финалното членство е потребен консензус, а ратификацијата зависи од сите држави членки“, додаде Лазаров.

Во однос на еврокомесарката за проширување Марта Кос, Лазаров изнесе сомнежи за нејзина поврзаност со поранешните југословенски служби и посочи дека таа не се појавила на сослушување во AFET. Тој го спомена и словенечкиот европратеник Матеј Тонин, за кого рече дека е пристрасен.

На прашањето дали е време за поодлучни мерки, Лазаров одговори потврдно и посочи дека бугарските претставници во Европскиот парламент ќе дејствуваат координирано. Тој ги пофали и известувачите во сенка Станислав Стојанов и Ивајло В’лчев за нивната работа.

Лазаров оцени дека Вајц преку извештајот се обидува да отвори прашања за статусот на вториот протокол, но дека тоа служи за создавање политичка бучава. Според него, Мицкоски „не сака Северна Македонија да влезе во ЕУ“ и намерно создава пречки.

Во врска со амандманот што се повикува на одлука на Европскиот суд за човекови права за случаите поврзани со ОМО „Илинден“, Лазаров оцени дека тоа претставува преседан, бидејќи се мешаат одлуки на различни меѓународни организации, вклучително и Советот на Европа.

Тој додаде дека Бугарија ја почитува одлуката, но дека организацијата, според него, намерно не ги исполнува процедурите за регистрација за да создава впечаток на дискриминација.

На крајот, Лазаров оцени дека не е прифатливо извештај за земја кандидат да се користи како инструмент за притисок врз земја членка. Тој додаде дека Вајц избегнувал директни разговори и „не може да издржи аргументи“.

И покрај критиките, Лазаров нагласи дека има добри односи во Северна Македонија и потсети на своето пријателство со поранешниот претседател Борис Трајковски, додавајќи дека сака земјата да стане членка на ЕУ бидејќи тоа би донело само убави нешта.