Бугарски научници влегоа во светската елита за вештачка интелигенција

Седум научни достигнувања со учество на научници од Институтот INSAIT кон Софискиот универзитет „Св. Климент Охридски“ беа примени на најпрестижниот светски форум за вештачка интелигенција – NeurIPS. Конференцијата е на прво место во областа на вештачката интелигенција и е рангирана во првите 10 научни конференции во светот меѓу сите области со хирш-5 индекс 309.

Публикациите на врвни научни конференции како што е NeurIPS се од стратешко значење за САД, Кина и другите водечки земји во развојот и имплементацијата на вештачката интелигенција. Во историјата на NeurIPS (конференција за системи за обработка на нервронни информации), од неговото создавање во 1987 година, до сега нема учество на бугарска институција.

Д-р Никола Константинов од INSAIT е супервизор на два од седумте примени трудови. Тие презентираат нови алгоритми за споделување податоци за да создадат подобри и посигурни модели со вештачка интелигенција. Развиените методи поврзуваат различни области на науката, како што се машинското учење и теоријата на игри, популаризирани со играниот филм A Beautiful Mind, посветен на нобеловецот Џон Неш.

Во една од овие научни статии учествуваат и проф. д-р Мартин Вечев, архитект на INSAIT и Георги Пашалиев, ученик во 12-то одделение од софиската математичка гимназија. Своето име меѓу научниците со одобрен извештај на престижната конференција го најде и докторантот на INSAIT Антон Александров. Во трудот е претставен нов метод за креирање повеќејазични бази на податоци кои се користат за обука на вештачка интелигенција. Во останатите четири публикации учествува проф. д-р Лук Ван Гул, еден од водечките светски научници и пионер во вештачката интелигенција, кој му се придружи на INSAIT во 2022 година. Неговите публикации се во сферата на 3D дифузните модели, компјутерскиот вид и др.