Бугарскиот амбасадор во Романија повика на поинтензивна соработка и подобра поврзаност меѓу двете земји преку Дунав

Бугарскиот амбасадор во Романија, Радко Влајков, ја истакна потребата од забрзување на соработката во Југоисточна Европа и изградба на повеќе врски меѓу Бугарија и Романија преку Дунав. Тој учествуваше на конференцијата „Средба на врвот на лидерите“ во Букурешт, соопшти Амбасадата на Бугарија во Романија.

Влајков се обрати во рамките на панелот „Надвор од границите: Дипломатијата во свет што се менува“, одржан на вториот ден од конференцијата. Настанот го организираше медиумската група „МедиаУно“, а домаќин беше Романскиот дипломатски институт.

Според соопштението, амбасадорот нагласил дека односите во регионот треба да достигнат „европска брзина“, како во дијалогот за секојдневните прашања, така и за стратешките теми, меѓу кои е поврзаноста.

Тој ја истакнал улогата на дипломатијата во одржувањето на неопходните контакти меѓу институциите од двете страни на Дунав, со цел да се најдат најдобри решенија за двата народа.

Меѓу главните предизвици за Бугарија, Романија и Југоисточна Европа, Влајков ги посочил климатските промени, широката примена на вештачката интелигенција и војните во Украина и на Блискиот Исток.

Во дискусијата била разгледана и идната насока на Бугарија по последните избори во земјата. Учесниците, меѓу кои и Влајков, изразиле уверување дека Бугарија е лојален партнер и член на ЕУ и НАТО, се наведува во соопштението.