Бугарскиот град Дрјаново одбележува 142 години од смртта на големиот градител и архитект мајстор Колјо Фичето

Во Дрјаново, Бугарија се одбележуваат 142 години од смртта на мајстор Колјо Фичето, јавува БТА.

На 15 ноември се одбележува годишнината од смртта на големиот бугарски градител и архитект Никола Фичев, познат како мајстор Колјо Фичето. Одбележувањето на годишнината започна со панихида во црквата „Св. Никола“, по што беа поднесени венци и свежо цвеќе пред споменикот на оваа маркантна историска личност во Историскиот музеј на Дрјаново. Претставници на општината ќе го посетат и гробот на возрожденскиот мајстор во Велико Трново, каде што ќе поднесат цвеќе, додаваат од локалната администрација.

Никола Фичев е роден во Дрјаново во 1800 година. Од мали нозе го научил ѕидарскиот занает кај стари мајстори. Благодарение на неговата трудољубивост и талент, тој станал најпочитуваниот мајстор-градител на своето време. Изградил над 50 објекти – храмови, мостови, јавни згради, куќи. Најзначајни се покриениот мост во Ловеч и камениот мост кај градот Бјала, црквите „Св. Троица“ во Свиштов и „Св. Свети Константин и Елена“ во Велико Трново, гостилницата на Хаџи Никола, зградата на гостилницата и Куќата со мајмунот во Трново, Домот на стопанството во Дрјаново и др., потсетуваат од општина Дрјаново.