Бугарскиот истражувачки брод „Св. св. Кирил и Методиј“ пристигна во Мар дел Плата на пат кон Антарктикот

Бугарскиот военен научноистражувачки брод „Св. св. Кирил и Методиј“ пристигна на 13 декември 2025 година во воената база на аргентинскиот град Мар дел Плата, по едномесечно пловење преку Атлантскиот Океан. Бродот беше пречекан од амбасадорот на Бугарија во Аргентина, Стојан Михајлов, претставници на бугарските здруженија во Буенос Ајрес, Берисо и Пресиденсија Роке Саенс Пења, како и од високи аргентински воени и парламентарни претставници, јавува БТА.

Командантот на бродот, капетан Радко Муевски, му поднесе рапорт на амбасадорот за прекуокеанскиот премин, при што беше потврдено дека екипажот и техниката се безбедни, и покрај силната бура што го зафатила пловниот објект неколку дена претходно.

На официјалниот пречек присуствуваа и началникот на Јужната поморска команда на Аргентина и командант на базата во Мар дел Плата, адмирал Марсело Патерностро, како и претседателката на Групата за пријателство во Долниот дом на аргентинскиот Конгрес, Сесилија Ибањес, заедно со претставници на бугарската заедница во земјата.

Бродот е дел од 34. Бугарска антарктичка експедиција и на 16 декември го продолжува патувањето кон Бугарската антарктичка база „Св. Климент Охридски“ на островот Ливингстон, каде што ќе достави опрема и резерви и ќе обезбеди поддршка за научноистражувачките проекти.

Бродот „Св. св. Кирил и Методиј“ исплови од Варна на 7 ноември 2025 година, а враќањето во Бугарија е планирано за средината на април 2026 година.