Бугарскиот јазик и културата повторно ги обединија студентите на Универзитетот во Тирана

Шеста година по ред Факултетот за странски јазици на Универзитетот во Тирана беше домаќин на Летната школа по бугарски јазик и култура – етаблирана иницијатива што обединува студенти, професори и пријатели на бугаристиката, јавува Радио Бугарија. Проектот го реализираат Факултетот за странски јазици и Катедрата за словенски и балкански јазици при Универзитетот во Тирана, во соработка со Универзитетот „Св. св. Кирил и Методиј“ во Велико Трново, преку програмата „Еразмус+“ и со поддршка од Амбасадата на Република Бугарија во Албанија.

Во текот на една седмица студентите не само што ги усовршуваа своите знаења по бугарски јазик, туку и се запознаваа со богатството на бугарската историја, литература и култура преку предавања, практична настава и разновидни културни манифестации.

Акцент во програмата беа предавањата на доц. д-р Раки Бело и д-р Миранда Бело од Универзитетот во Велико Трново. Тие ги запознаа студентите со улогата на бугарскиот јазик во меѓукултурната комуникација, нагласувајќи го неговото значење како носител на културната меморија и националниот идентитет. Преку богат избор на примери, учесниците се запознаа со бугарските традиции, празници, институции и духовно наследство.

Еден од највозбудливите моменти беше посетата на Амбасадата на Република Бугарија во Тирана, на покана на извонредниот и ополномоштен амбасадор Ивајло Киров. Студентите се запознаа со повеќе од едновековната историја на бугарско-албанските дипломатски односи и со образовната и културната соработка меѓу двете држави.

За време на средбата, бугарската дипломатска мисија му додели Почесен сертификат на раководителот на Катедрата за словенски и балкански јазици, доц. д-р Адриатик Дерјај, за неговиот долгогодишен придонес во развојот на бугаристиката во Албанија, популаризирањето на бугарскиот јазик и култура и зајакнувањето на академските врски меѓу Бугарија и Албанија.

За Радио Бугарија, доц. д-р Дерјај изјави дека наградата не е само голема чест, туку и дополнителна одговорност достоинствено да ги претставува Универзитетот во Тирана и албанската академска заедница во меѓународната соработка.

За Радио Бугарија тој ги коментираше предизвиците во својата работа:

„Бугаристиката е област од особено значење за балканистиката и меѓукултурните односи. Во текот на годините се соочувавме со различни предизвици – популаризирањето на студиската програма во универзитетот и надвор од него, ограничениот број студенти, потребата од современи наставни материјали и проширувањето на институционалната соработка со бугарските универзитети. И покрај тоа, благодарение на постојаната работа, успеавме да ја афирмираме бугаристиката на Универзитетот во Тирана. Едно од нашите најважни достигнувања е воспоставувањето одржлива врска меѓу професорите, истражувачите и студентите од двете земји, која го поттикнува меѓусебното запознавање со јазикот, културата и историјата.

Особено важна улога во овој процес имаа професорите испратени од Универзитетот во Велико Трново – доц. д-р Раки Бело и д-р Миранда Бело, кои го донесоа богатото бугарско академско искуство во нашите предавални. Без нивната поддршка, професионализам и посветеност, бугарскиот јазик немаше да ги достигне популарноста и вниманието што денес ги ужива меѓу нашите студенти.“

Доц. д-р Дерјај ја изрази својата идеја во Тирана да биде основан Институт за бугарски студии, кој би се претворил во центар за изучување на бугарскиот јазик, литературата и современите лингвистички истражувања.

Во однос на интересот за бугарскиот јазик и култура меѓу студентите на албанскиот универзитет, тој нагласи:

„Интересот на студентите за бугарскиот јазик и култура постојано расте, особено благодарение на можностите што ги нудат програмите за академска размена, стипендиите, меѓународните проекти и регионалниот пазар на труд. Сè повеќе студенти сфаќаат дека познавањето на јазиците од регионот е важна професионална и академска предност. Нашата цел е да ја прошириме соработката со бугарските универзитети преку заеднички научноистражувачки проекти, мобилности во рамките на програмата „Еразмус+“, организирање научни конференции, летни школи и заеднички публикации“, посочи доц. д-р Дерјај.

Културната програма на Летната школа ги одведе студентите и надвор од универзитетските предавални. Тие го посетија историскиот град Берат – дел од светското културно наследство на УНЕСКО, каде што се запознаа со богатото наследство на регионот и со историските врски меѓу Бугарија и Албанија.

Посебен интерес предизвикаа светилиштата поврзани со светите Климент, Наум, Сава, Горазд и Ангелариј – учениците на светите браќа Кирил и Методиј, кои оставиле трајна трага во историјата на бугарската духовност и словенската писменост.

Завршницата на Летната школа беше одбележана со свечено доделување сертификати од Универзитетот „Св. св. Кирил и Методиј“ во Велико Трново. На церемонијата присуствуваа проф. д-р Тодор Глаунов од Универзитетот во Велико Трново, како и првиот секретар на Амбасадата на Република Бугарија во Тирана, Илијан Крумов.