Бугарскиот камерен оркестар – Добрич со успешна едукативна програма

Традиција е Бугарскиот камерен оркестар – Добрич секоја година во јануари да изведува едукативни концерти за учениците од градот. Постепено, интересот за иницијативата растеше и на 13 јануари 2025г. ансамблот ја покани младата публика на три последователни настани во Органовата сала во Добрич, која има капацитет од 550 седишта. Така, за само еден ден, повеќе од 1.600 деца слушале класична музика и научиле повеќе за гудачките инструменти и органите.

Диригентот Арто Чифчијан е личноста која ги води овие средби со музика – на присутните им раскажува за авторите на избраните дела и за секоја изведба. На овогодинешната програма беа прикажани ремек-дела од Бах, Моцарт, Брамс, Шостакович, Шнитке, Брегович – вистинско музичко патување низ различни епохи. На крајот од концертот, ученик од публиката беше поканет да го диригира „Радецки марш“ од Јохан Штраус -татко – еден вид шоу елемент во програмата, според зборовите на маестро Чифчијан.

Бугарскиот камерен оркестар – Добрич ќе ја продолжи едукативната програма во февруари по договор со раководството на образовните институции во градот.

Во меѓувреме, на 24 јануари во 19 часот, Арто Чифчијан ќе диригира симфониски концерт на Оркестарот на Државната опера на Варна со солистката виолинистка Абигејл Воскина од Албанија. На програмата: Концерт за виолина и оркестар бр.1 од Макс Брух и симфонија бр.7 од Лудвиг ван Бетовен.

***

Арто Чифчијан е музички директор на Бугарскиот камерен оркестар – Добрич и е награден со „Кристална лира“ од Сојузот на бугарските музички и танцови уметници во категоријата диригенти во 2023 година. Покрај водечките бугарски оркестри, тој настапувал и со Ерменската филхармонија во Ереван, Државниот симфониски оркестар на Солун и Симфонискиот оркестар од Стразбур. Чифчијан беше музички директор на Државната опера во Анталија, Турција. 8 години бил диригент на Државната опера – Русе, каде подготвил и диригирал над 200 оперски и балетски претстави. Маестрото учествува на меѓународни форуми како што се Меѓународниот музички фестивал во Кефалонија – Грција, Меѓународниот фестивал на камерна музика во Пловдив, фестивалот на камерна музика во Габрово, фестивалот на пролетна музика Хасково итн.

Фото: БНР