Бугарскиот министер Илин Димитров: Целта ни е бројот на странски туристи во Бугарија да достигне осум милиони годишно

Бугарската влада има цел до крајот на својот мандат да го удвои бројот на странски туристи во земјата, од околу четири на осум милиони годишно, а истовремено да го задржи бројот на домашни туристи кои избираат одмор во Бугарија, изјави министерот за туризам Илин Димитров, пренесува БТА.

Тој ја претстави целта на Националната средба на државата, локалната власт и туристичкиот бизнис „Долголетие/Гостопримливо море 2026“, одржана во Историскиот музеј во Царево.

„Од една страна, странците ќе внесуваат свеж капитал, а од друга, Бугарите треба да бидат стимулирани да ги посетуваат нашите одморалишта“, рече Димитров.

Според него, повеќе од 65 проценти од туристите на бугарското Црноморие ова лето биле домашни гости. Конечните податоци за летната сезона ќе бидат сумирани во октомври.

„Податоците досега покажуваат дека сезоната е слична на минатогодишната. Поради зголемувањето на цените и други фактори, приходите досега се повисоки за околу 15 до 18 проценти“, изјави министерот.

Тој нагласи дека станува збор за приходи, додека податоците за добивката и вкупното работење на туристичкиот сектор ќе бидат познати следната година, по поднесувањето на деловните пријави.

Димитров оцени дека разликата во споредба со минатата сезона најверојатно ќе биде во рамки од плус или минус еден процент, а септември годинава е подобар од истиот месец лани.

„Сезоната почна малку повнимателно и потешко, но во моментов мислам дека нема да забележиме пад. Ова е нашата прва сезона откако сме во еврозоната“, рече Димитров.

Според податоците на бугарскиот Национален статистички институт, во периодот од јануари до јули 2026 година во земјата биле регистрирани 5,2 милиони туристи, од кои три милиони домашни и 2,2 милиони странски.

Просечниот престој на бугарските туристи во сместувачките капацитети изнесувал 2,4 ноќевања, а на странските 3,8 ноќевања.

Приходите од ноќевањата на домашните туристи во периодот јануари – јули достигнале 360 милиони евра, што претставува раст од 18,1 процент. Приходите од странските туристи изнесувале 520 милиони евра, со раст од 10,5 проценти.

Во периодот од мај до јули биле регистрирани вкупно 3,1 милион туристи, нешто повеќе од 11 милиони ноќевања и приходи од 627 милиони евра, што е зголемување од 13 проценти.

Според прелиминарните податоци од Единствениот систем за туристички информации, од почетокот на годината до средината на септември биле регистрирани повеќе од 7,3 милиони туристи. Министерството за туризам очекува во целата летна сезона, од јуни до септември, бројот на регистрации да надмине пет милиони.

Димитров најави дека Владата планира дополнително продолжување на летната сезона во 2027 година, а како позитивен сигнал го посочи германскиот пазар.

„Имаме добри вести за германскиот пазар уште отсега. Веќе најавените 150.000 седишта значително ќе ја променат сликата на сезоната“, рече тој.

Според министерот, туристите од Германија традиционално пристигнуваат порано и заминуваат подоцна. Планот е сезоната во 2027 година да почне со Велигден на почетокот на мај, да продолжи со одржувањето на „Евровизија“ во Бургас, а потоа хотелите без прекин да преминат во активната летна сезона.

„Ако успееме да го направиме тоа, сезоната ќе биде повеќе од успешна“, изјави Димитров.

Министерството планира и реформа во начинот на функционирање на туристичкиот сектор. Краткорочните сместувања и платформите преку кои тие се нудат треба да бидат вклучени во Единствениот систем за туристички информации и да ги пријавуваат реализираните ноќевања.

„Ова не е кампања против краткорочните сместувања, сакаме да бидеме партнери на бизнисот“, нагласи Димитров.

Тој укажа и на потребата од поголем буџет за туристичка промоција, оценувајќи дека сегашните средства не се доволни.

Иницијативата „Долголетие“ на бугарското Министерство за туризам е насочена кон продолжување на туристичката сезона на јужното Црноморие, со посебен фокус на септември и октомври.

Проектот почна во 2025 година во соработка со Обласната администрација во Бургас и крајбрежните општини, со цел регионот да се промовира не само како летна дестинација, туку и преку културен, историски, спортски и фестивалски туризам надвор од главната сезона.