Бугарскиот министер за култура Најден Тодоров во Скопје: Не е клише дека културата создава мостови
Не е клише дека културата создава мостови, рече министерот за култура Најден Тодоров на средба во Бугарскиот културно-информативен центар во Скопје со креативниот тим на Драмскиот и куклен театар „Враца“ кој ја претстави претставата „Гимнастика за трудници“ синоќа во Скопје, како дел од неговата турнеја во Северна Македонија, која се реализира со поддршка на бугарското Министерство за култура.
Со поддршка на Министерството за култура, оваа година многу бугарски културни институции ги презентираат своите креативни достигнувања на сцените во различни градови во Република Северна Македонија, а во наредните денови ќе гостува Државната опера Русе во Скопје и Драмскиот театар Благоевград во Битола, јавува БТА.
„Поентата на она што го правиме е да ги изградиме скршените мостови преку вас. Се надевам дека бугарските театри ќе продолжат да настапуваат во Република Северна Македонија, а театрите од Северна Македонија ќе дојдат во Бугарија“, рече Најден Тодоров.
Министерот за култура ја разгледа изложбата „Нерамноделни“ на Гергана Змијчарова и Петринел Гочев, уредена во затворената галерија на Бугарскиот културно-информативен центар во Скопје.
Најден Тодоров денеска во Скопје учествуваше на панелот „Создавање култура во Европа“ на годишната и единствена меѓународна музичка конференција „PIN MUSIC“, заедно со претставници од Грција, Естонија, Северна Македонија.
„Тоа беше креативна дискусија за улогата на уметноста во обединета Европа и поврзаноста, преку уметноста, меѓу различните земји“, резимира Тодоров за БТА, кој беше поканет да учествува на конференцијата во двојна функција – како министер за култура и како диригент во Софиската филхармонија.
Тој вечерва ќе присуствува на концертот со кој Филхармонијата на Република Северна Македонија го прославува својот 80-годишен јубилеј. Најден Тодоров диригирал на сцената на Филхармонијата во Скопје.
