„Буржоаскиот благородник“ на сцената на Сатиричниот театар

На 3 октомври во Сатиричниот театар „Алеко Константинов“ ќе биде премиерно изведена претставата „Буржоаскиот благородник“ од Жан Батист Поклин Молиер. Режисер на претставата е актерката Бојка Велкова, сценографијата е дело на Чавдар Ѓузелев, костимите – Тита Димова-Вантек, музиката – Теодосиј Спасов и пластика – Мила Искренова.

„Буржоаскиот благородник“ е напишана од Молиер по налог на Кралот Сонце (Луј XIV) во 1670 година. Тоа е драма за човечката глупост и суета. Францускиот драматург со леснотија, изобилство од фарса и сатира забавува, но и едуцира, презентирајќи голем број општествени, дидактички и идеолошки проблеми.

Желбата на богатиот буржоаз г-дин Журден да влезе во високото општество и да стане благородник предизвикува вистинска смеа. Тој е наивен, директен, дарежлив и непромислен во остварувањето на своите соништа. Тој верува во семоќта на парите и е опкружен со најдобрите учители за да ја постигне својата цел. Тоа е она што го прави глупаво смешен, дури и кога сите го залажуваат. Молиер ги разоткрива општествените и човечките пороци и на тој начин претставата предизвикува асоцијации на настани од денешницата.

„Буржоаскиот благородник“ е комедија-балет, жанр што ја поставува сцената за мјузиклот. Во улогите ќе ги видиме актерите – Николај Врбанов, Елена Атанасова, Ангелика Џамбазова, Лана Гекова, Михаил Сарвански, Александар Григоров, Полин Лалова, Љубомир Ковачев, Константин Икономов, Мартин Каров, Живко Сираков и Јордан Сталев.

Следните датуми на „Буржоаскиот благородник“ се 12 и 30 октомври, 8 и 22 ноември.

За „Артефир“ Надја Атанасова пред премиерата се сретна со режисерката Бојка Велкова и актерите Полин Лалова и Љубомир Ковачев.

Фото: БНР