Директорот на софиската болница „Пирогов“ д-р Димитров една година по трагедијата во Кочани: Најважно е да бидеме луѓе и да помагаме

„Најважно е да бидеме луѓе, да бидеме емпатични и да помагаме“, изјави директорот на Универзитетската повеќепрофилна болница за активно лекување и итна медицина „Н. И. Пирогов“, д-р Валентин Димитров, на меѓународната конференција „Институционални и клинички аспекти и решенија по пожарот во Кочани – една година подоцна“, која се одржа во Скопје, јавува БТА.

Димитров истакна дека ниту една држава не е целосно подготвена за трагедии како пожарот во дискотеката „Пулс“ во Кочани на 16 март 2025 година, во кој загинаа 63 млади лица, а повеќе од 200 беа повредени.

„Кога се случува ваква трагедија, почнува мобилизација на институциите и луѓето за да им се помогне на настраданите. Помошта започнува со логистика, организација и транспорт, а лекувањето е дел од целиот процес за спасување животи“, рече тој.

Според неговата оценка, иако Северна Македонија не била подготвена за ваков инцидент, реакцијата била брза и ефективна благодарение на соработката меѓу соседните држави и институциите.

„Од сите повредени кои беа транспортирани во Бугарија нема ниту еден починат. Успеавме да им го спасиме животот и да продолжиме со лекувањето и поддршката за да се вратат во нормален живот“, нагласи Димитров.

Тој додаде дека пациентите и понатаму доаѓаат на контроли во „Пирогов“ и дека благодарноста од граѓаните е најголемата награда за лекарите.

„Најважно е да бидеме луѓе и кога е потребно да помагаме, без оглед на околностите. Хуманоста мора да биде на прво место, особено кога станува збор за деца“, рече Димитров.

По трагедијата, Бугарија испрати медицинска помош, воениот авион „Спартан“ за транспорт на повредени и шест амбулантни возила со медицински тимови. Во бугарските болници беа примени 14 повредени, а последниот пациент од „Пирогов“ беше отпуштен на 15 мај 2025 година.