ЕУ КАРАВАНОТ ТРГНА ОД КАРПОШ

Основците од ООУ „Петар Поп Арсов“се приклучија кон ЕУ караванот кој денеска тргна од скопската населба Карпош 4. По повод Денот на Европа (9. мај), како дел од кампањата „ЕУ за тебе“, патувачкиот автобус на ЕУ почнувајќи од 20. мај во Куманово ќе посети уште седум градови ширум нашата држава.

Предводени од евроамбасадорот во Северна Македонија, Самуел Жбогар, претставници од Делегацијата на ЕУ и амбасадорите на Словенија, Франција, Холандија, Романија Шведска, Хрватска, Бугарија и Унгарија, до крајот на месецов ќе ги посетат и Свети Николе, Виница, Делчево, Струга, Дебар, Радовиш и Гевгелија.

Целта на патувачкиот автобус на ЕУ чии „патници“ се и студенти и претставници на медиуми од земјава, е да се воспостави директна комуникација со граѓаните и да се поттикне дискусија за нивните очекувања во врска со Европската Унија и европската иднина на нашата земја.

Граѓаните ќе имаат можност да постават прашања поврзани со Европската Унија, процесот на пристапување во ЕУ, можностите за финансирање преку ИПА-фондовите и други програми за помош на ЕУ, преку директна комуникација со екипата на ЕУ патувачкиот автобус. Посетите вклучуваат дебати со ученици од средните училишта за „Визијата на младите за Европската Унија“, велосипедски родео активности за најмалите, како и други активности.

Во рамки на кампањата „За чисто како дома исто“, евроамбасадорот Жбогар ќе се сретне со еколозите и активистите од Охрид и Струга. Притоа, граѓаните можат да се регистрираат како еко-активисти и да учествуваат во акциите за чистење кои ќе се спроведат во нивните градови. Активистите и општините можат да учествуваат во т.н предизвик „пред и потоа“.