ЕУ ќе го прекине увозот на руска нафта и гас до почетокот на 2028 година

Амбасадорите на земјите членки на Европската унија постигнаа договор за целосен прекин на увозот на руска нафта и гас до почетокот на 2028 година, јавува агенцијата Ројтерс, повикувајќи се на три европски дипломатски извори, јавува БНР.

Според извештајот, речиси сите земји-членки го поддржале планот, што ќе овозможи негово официјално усвојување на 20 октомври, и покрај отпорот на Унгарија и Словачка, кои и натаму имаат блиски енергетски врски со Русија. Овие две земји ќе треба да поднесат национални планови за постепено запирање на рускиот увоз до почетокот на 2028 година.

Франција и Белгија, кои сè уште увезуваат дел од руското природно гориво, исто така ќе бидат опфатени со мерките.

До почетокот на војната во Украина, Русија обезбедуваше 45% од гасот што го користеше Европа, но тој удел сега е намален на само 12%, наведува Ројтерс.

Покрај тоа, Европската унија подготвува нов пакет санкции против Москва, кој предвидува запирање на увозот на руски втечнет природен гас (LNG) од јануари 2027 година.