Европската комисија одобри делумна исплата од третата транша од Планот за закрепнување за Бугарија

Европска комисија на 22 декември донесе официјална одлука за делумно извршување на третата исплата кон Бугарија во рамки на Националниот план за закрепнување и отпорност. Одобрената исплата изнесува 1,465 милијарди евра, соопшти Комисијата.

Одлуката е донесена по добиено мислење од Економскиот и финансискиот комитет при Советот на ЕУ и по одговор од бугарските власти на прелиминарната оценка на Комисијата. Истовремено, Европската комисија одлучи привремено да задржи 152,896 милиони евра, пресметани според стандардната методологија на Механизмот за закрепнување и отпорност.

Оваа одлука следува по делумно позитивната оценка од 2 декември, кога беше утврдено дека Бугарија успешно исполнила 48 од вкупно 50 клучни етапи и цели поврзани со третото барање за исплата. Сепак, Комисијата констатира дека не се целосно исполнети клучниот етап 220, поврзан со воспоставување и почеток на работа на орган за борба против корупцијата, како и дел од барањата на етап 222, кои се однесуваат на правната рамка за кривични постапки и отчетноста и кривичната одговорност на главниот обвинител.

Поради тоа, дел од средствата се привремено одложени. Од Европската комисија наведуваат дека Бугарија има рок од шест месеци да ги спроведе потребните реформи, по што задржаниот износ ќе може да биде ослободен.