Филипов за БНР: Дојде време за нормализирање на дијалогот меѓу Софија и Скопје

Дојде време за нормализирање на дијалогот меѓу Софија и Скопје. Ова за Бугарското национално радио го изјави Коста Филипов, кој е долгогодишен дописник на БНТ и БНР во Скопје.

„Се надевам дека на 4 февруари нема да има остри инциденти и суптилни обиди за провокација од двете страни. Нема ништо лошо во тоа што луѓето од двете страни на границата заедно го слават Гоце Делчев“

Коста Филипов ја коментираше изјавата на Даниел Лорер од ПП дека Христијан Пендиков, кој беше брутално претепан во Северна Македонија, не е бугарски државјанин, туку само се изјаснувал како Бугарин.

„И порано сме имале такви несмасни изјави на тема Северна Македонија на Даниел Лорер. Ова се должи на непознавањето на конкретната состојба и на севкупната состојба во Северна Македонија. Ова е ниска политичка култура“

И пред случајот со Христијан Пендиков имаше напади врз бугарски клубови, дури и обиди за нивно палење, потсети Филипов.

„Овој случај е дел од една серија. Очигледно, дојде време да се каже дека тоа не може да се прави во однос на луѓето кои ја декларирале својата бугарска самосвест“.

Врвот на тензијата што настана како последица на случајот со претепувањето на Христијан Пендиков е достигнат и кривината оди надолу, смета Филипов.

Тој сугерира дека и од бугарска страна се направени превентивни активности во однос на организаторите на групите што треба да патуваат во Северна Македонија.

„Имам чувство дека неуспехот да се формира влада создаде малку повисок степен на нервоза кај нашите политичари. Во Северна Македонија, исто така, има притисок од ВМРО-ДПМНЕ за одржување на предвремени избори, на кои партијата очекува да се врати на власт“, објаснува новинарот.

„Сепак, стана јасно дека бугарскиот амбасадор се враќа во Скопје и во целост ќе ги извршува своите должности“, вели Филипов.