(Галерија) Во Охрид беше одбележана 16-годишнината од трагедијата во Охридското Езеро, во која загинаа 15 бугарски туристи

Претставници на бугарските дипломатски мисии во Скопје и Битола во Северна Македонија, генералниот директор на БТА Кирил В’лчев, заменик-градоначалничката на Охрид Ана Крстевска, претставници на општинската администрација во градот и на здруженијата на бугарската заедница во Република Северна Македонија ја одбележаа 16-годишнината од трагедијата во Охридското Езеро, во која загинаа 15 бугарски туристи, откако бродот „Илинден“ потона во езерото, јавува БТА.

Генералниот конзул на Бугарија во Битола, Николај Димитров, потсети на трагедијата, која се случи на 5 септември 2009 година во 10:30 часот. Група бугарски туристи се качуваат на бродот „Илинден“, кој превезувал 57 патници од Охрид до манастирот „Св. Наум“. Бродот се превртува и потонува на околу 250 метри од брегот на езерото.

„Групата бугарски туристи од Пирдоп, селата Антон, Рибарица, Мирково и Златица тргнува со желба да го посетат и разгледаат саканиот во нашата земја Охрид. За жал, овие 15 наши сонародници никогаш повеќе не се вратија дома. Должни сме да истакнеме дека трагедијата ќе беше уште поголема ако не беа локалните луѓе. Укажаната навремена помош и брзите реакции на граѓани и водачи на пловни објекти, на војници од блиската единица на армијата на Северна Македонија, спасија 35 Бугари од туристичката група. Спасените животи на овие Бугари нè обврзуваат повторно да изразиме благодарност кон морнарите Васко Маркоски и Драган Наумовски од екипажот на бродот „Александрија“, кон Зоран Гилевски, капитанот Петар Василев, капитанот на бродот „Кристина“ Васко Јанев, кон командирот од блиската армиска единица Раде Буџаковски, дежурниот офицер Влатко Димановски и нивните војници кои се вклучија во спасувањето на Бугарите од потопениот брод „Илинден“. Ова спомен-место е и во нивна чест. Тоа треба да потсетува на подготвеноста на локалните луѓе да помогнат на оние што се најдоа во неволја. Пројавената храброст и солидарност на овие граѓани на Охрид нè обврзува да доаѓаме на ова поклонение секоја година и да засведочиме дека Бугарија не ја заборавила нивната подготвеност да помогнат“, рече генералниот конзул на Бугарија во Битола, Николај Димитров.

Присутните положија свежо цвеќе на споменикот на брегот на Охридското Езеро, издигнат во спомен на загинатите бугарски туристи.