Георгиев-Рубио: Односите на САД и Бугарија ќе се развиваат во областа на безбедноста, енергетиката, економијата и технологијата

Министерот за надворешни работи на Бугарија, Георг Георгиев, се сретна со државниот секретар на САД, Марко Рубио, во рамки на трансатлантската вечера организирана од Стејт департментот со учество на министри за надворешни работи од земјите членки на НАТО и партнерските држави, пренесува БГНЕС.

Георгиев и Рубио разговараа за клучни прашања поврзани со безбедноста во Црноморскиот регион, енергетската одржливост на Европа и зајакнувањето на трансатлантските врски. Во текот на разговорот, двајцата ја потврдија посветеноста на двете земји за продолжување на стратешкиот дијалог и продлабочување на соработката во интерес на безбедноста, просперитетот и демократските вредности.

Посебен акцент беше ставен на заедничките напори за поддршка на Украина и на потребата од зачувување на единството во рамките на НАТО и Европската унија во контекст на тековната агресија од страна на Руската Федерација, соопшти бугарското Министерство за надворешни работи.

Министерот Георгиев изрази благодарност за доследната поддршка од САД за стабилноста и демократскиот развој на Југоисточна Европа и ја истакна стратешката важност на бугарско-американското партнерство.

Од своја страна, државниот секретар Рубио ја поздрави активната улога на Бугарија во рамките на НАТО и нејзиниот придонес кон регионалната безбедност.

Двајцата соговорници се согласија дека билатералните односи меѓу САД и Бугарија ќе продолжат да се развиваат во нагорна насока – како во областа на безбедноста, така и во енергетиката, економијата и технологијата.