Германија планира најголема модернизација на војската во Европа – 377 милијарди евра за сите одбранбени сектори

Германија подготвува амбициозен план вреден 377 милијарди евра за модернизација на Бундесверот – покривајќи копнени, воздушни, поморски, вселенски и кибер системи. Целта е создавање на „најсилната конвенционална армија во Европа“, како што порача лидерот на ЦДУ, Фридрих Мерц, јавува БГНЕС.

Планот, кој ќе биде конкретизиран во буџетот за 2026 година, содржи 320 нови проекти за оружје и опрема, од кои 178 веќе имаат избрани изведувачи. Околу 160 проекти во вредност од 182 милијарди евра се поврзани со германски компании. Rheinmetall е најголем добитник – ќе добие над 88 милијарди евра за програми како „Puma“ и „Boxer“. Diehl Defence ќе учествува со ракети IRIS-T во вредност од 4,2 милијарди евра.

Во планот се вклучени и 14 милијарди евра за сателитски програми, меѓу кои и констелација на нискоорбитални сателити за безбедна воена комуникација. Министерот за одбрана Борис Писториус најавува дополнителни 35 милијарди евра за „вселенска безбедност“.

Дел од средствата – околу 14 милијарди евра – се наменети за набавки од странство, вклучувајќи 15 ловци F-35, крстосувачки ракети Tomahawk и патролни авиони Boeing P-8A. Тие ќе ја зајакнат поврзаноста на Германија со американските системи, иако најголемиот дел од буџетот останува во рамките на домашната индустрија.

Нов модел на финансирање, кој Берлин го разгледува, предвидува воените трошоци да се изземат од уставниот долг, што би овозможило стабилно и долгорочно вложување во одбраната.