Грчките медиуми го истакнуваат придонесот на Бугарија кон енергетската безбедност во регионот

По состанокот на Партнерството за трансатлантска енергетска соработка во Атина, грчките медиуми објавија низа коментари во кои го потенцираат значењето на Бугарија за енергетската стабилност и поврзаност на регионот, јавува БНР.

Според медиумите, особено внимание привлекле резултатите од разговорите меѓу бугарскиот министер за енергетика Жечо Станков и американскиот заменик-секретар за енергетика Крис Рајт. Американската страна дала висока оценка за напредокот на Бугарија во реализацијата на стратешкиот проект „Вертикален гасен коридор“, кој има клучна улога за диверзификацијата на снабдувањето со гас во Југоисточна Европа.

Експерти наведуваат дека двете делегации разговарале и за соработката во нуклеарната енергетика, вклучително и за можностите за примена на мали модуларни реактори во Бугарија.

Грчките медиуми го пренесуваат ставот на бугарскиот претставник дека придонесот на земјата за регионалната енергетска безбедност се заснова на поврзаност, диверзификација и сигурни енергетски испораки.

Во анализите се споменува и постигнато разбирање американските извозници на течен природен гас да ги намалат цените помеѓу 25% и 50%, што би влијаело позитивно врз пазарот.

Американскиот претставник Крис Рајт го поздравил стремежот на Бугарија и Грција кон привлекување инвестиции во технологии за развој на центри што ќе ја зајакнат одржливоста на енергетските системи на двете земји.

Во грчките коментари е посочено и учеството на Бугарија во гасната инфраструктура за прием на течен гас од островот Ревитуса, како и во терминалот кај Александруполис, каде што Бугарија поседува 20% од акциите.