Белата куќа ги демантира тврдењата на Унгарија за неограничено изземање од санкциите за руски енергенси

Белата куќа ги отфрли изјавите на унгарската влада дека изземањето од американските санкции за увоз на руски енергенси важи без временско ограничување. Спорот меѓу двете страни избувна веднаш по посетата на унгарскиот премиер Виктор Орбан во Вашингтон во петокот навечер.

По средбата со американскиот претседател Доналд Трамп, Орбан изјави дека испораките на гас преку гасоводот „Турски тек“ низ Бугарија, како и испораките на нафта преку нафтoводот „Дружба“ преку Белорусија, нема да подлежат на санкции. Унгарскиот министер за надворешни работи Петер Сијарто дополнително увери дека изземањето нема рок.

Меѓутоа, портпарол на Белата куќа, цитиран од агенцијата Ројтерс, појасни дека изземањето е ограничено и дека трае една година.

Изземањето е од суштинско значење за Унгарија, која и понатаму зависи од рускиот петрол за над 85% од своите потреби. Меѓународниот монетарен фонд предупреди дека ненадеен прекин на испораките би ја чинел земјата околу 4% од брутниот домашен производ. Според Орбан, активирањето на санкциите би ги зголемило трошоците за домаќинствата трипати во текот на претстојната зима.

Одложувањето на санкциите, сепак, е поврзано со потпишување на низа значајни договори меѓу Унгарија и САД. За време на посетата на Орбан беа договорени купување американски течен природен гас во вредност од 600 милиони долари, нуклеарно гориво за 114 милиони долари, технологии за складирање потрошено нуклеарно гориво во износ до 200 милиони долари, како и план за набавка на до десет мали модуларни нуклеарни реактори со вкупна вредност од 10 до 20 милијарди долари.

Според аналитичарите, договорите претставуваат дел од поширокиот дипломатски договор меѓу двете држави во контекст на привременото олеснување на санкциите.