ГУВЕРНЕРКАТА НА НБРМ АНГЕЛОВСКА-БЕЖОСКА НЕ ОЧЕКУВА РАСТ НА ИНФЛАЦИЈАТА
Не се очекува пораст на стапката на инфлација, очекувањата за движењата на цените на примарните производи до крајот на годината се коригирани надолу, вели гувернерката на Народната банка, Анита Ангеловска-Бежоска.
„Пандемијата негативно се одрази врз глобалната побарувачка, што доведе до надолно прилагодување на цените на повеќето берзански производи. Овој пад е посебно изразен кај цените на нафтата на светските пазари, каде што дополнителен ефект имаше и неможноста за договор помеѓу најголемите производители на овој енергенс. Ваквите поместувања ќе имаат директен надолен ефект врз стапката на инфлација во македонската економија преку пониските домашни цени на горивата, што, впрочем е веќе видливо и преку мартовските податоци за инфлацијата. Пониските цени на енергентите, коишто се влезна компонента и кај другите производи и услуги, може дополнително да влијаат и на останатите цени, истакнува Ангеловска-Бежоска, во интервју за неделникот „Капитал“.
Според гувернерката, покрај директниот ефект од пониските увозни цени, надолно влијание врз цените кај нас се очекува и преку каналот на домашната побарувачка. Дел од преземените мерки за спречување на ширењето на вирусот, како што напоменува таа, влијаат во насока на одложување на потрошувачката на домаќинствата, што би можело да доведе и до надолно прилагодување на цените во македонската економија.
