Иран: Подготвени сме да ја браниме нашата нуклеарна програма

Иран ја бранеше својата нуклеарна програма и нема да се двоуми да продолжи да го прави тоа, изјави портпаролот на иранското Министерство за надворешни работи Есмаил Багаи еден ден откако Израел и САД ветија дека ќе се спротивстават на иранските нуклеарни амбиции.

„Иранската мирољубива нуклеарна програма продолжува, како и во изминатите три децении, врз основа на правата на Иран како потписник на Договорот за нуклеарно неширење. Дефинитивно нема да покажеме слабост по ова прашање“, рече портпаролот.

Израелскиот премиер Бенјамин Нетанјаху еден ден претходно, по средбата со американскиот државен секретар Марко Рубио во Ерусалим, изјави дека САД и Израел се решени да се спротивстават на нуклеарните амбиции на Иран и неговото влијание на Блискиот Исток.

Рубио рече дека „зад секоја терористичка група, секој чин на насилство, зад секоја дестабилизирачка активност, се што ги загрозува мирот и стабилноста за милиони луѓе кои овој регион го нарекуваат дом, стои Иран“.

За време на неговиот последен мандат во 2018 година, американскиот претседател Доналд Трамп ги повлече САД од нуклеарниот договор меѓу Иран и нуклеарните сили и воведе нови, строги санкции врз него. Иран одговори со прекршување на ограничувањата на тој договор со надополнување на залихите на збогатен ураниум, рафинирање на својата фисилна чистота и инсталирање центрифуги за да го зголеми своето производство.

Спорот за иранската нуклеарна програма повторно ескалира во последните месеци.

По критиките од Меѓународната агенција за атомска енергија (МААЕ), Техеран во ноември објави дека планира да стави во функција илјадници нови центрифуги за збогатување ураниум.

Иран моментално збогатува ураниум до 60 проценти. Експертите тврдат дека за нуклеарно оружје тоа треба да се збогати на повеќе од 90 проценти.

Текстот Иран: Подготвени сме да ја браниме нашата нуклеарна програма е превземен од МАКФАКС.