Јотова: Цела Бугарија е со спортистите на Зимските олимписки игри во Милано и Кортина

Цела Бугарија стои зад своите спортисти кои ќе учествуваат на XXV Зимски олимписки игри во Милано и Кортина, изјави претседателката Илијана Јотова, соопшти прес-секретаријатот на претседателската институција.

Бугарија ќе биде претставена со 20 спортисти во биатлон, алпски сноуборд, алпско скијање, ски-скокови, скијачко трчање и уметничко лизгање. „Тие се големи професионалци кои многу работат на себе и треба да се горди на своите достигнувања. Во наредните денови цела Бугарија ќе ги следи, ќе се возбудува со нив и ќе ги поддржува. Медалите што ќе ги освојат се бесценети за нас“, рече Јотова.

Претседателката потсети и на значајни годишнини поврзани со олимпиското движење – вклучувањето на Бугарија во 1896 година, 120 години од членството на Димитар Цоков во Меѓународниот олимписки комитет и 90 години од првото бугарско учество на Зимска олимпијада. „Оваа историја е повод за гордост и одговорност“, нагласи таа.

Јотова повика политиката да остане далеку од спортот и изрази поддршка за идеите на претседателката на МОК, Кирсти Ковентри, за развој на олимписките игри во тесна соработка со спортистите.

Претседателката се наоѓа во Милано по покана на МОК за официјалното отворање на Олимпијадата, каде ќе присуствува на приеми и на церемонијата на стадионот „Сан Сиро“.