Јотова отвори изложба за бугарската азбука во Подгорица

Потпретседателката на Бугарија Илијана Јотова ја отвори изложбата „Азбука и историја“ на бугарскиот штанд на 19-тиот Меѓународен саем на книгата и образованието во црногорската престолнина Подгорица. Бугарија е почесен гостин на големиот форум, пренесува БГНЕС.

Потпретседателката ги претстави пред бројните луѓе, кои дојдоа на отворањето на бугарскиот штанд, двете големи годишнини кои Бугарија ги прославува – 1160 години од покрстувањето на бугарскиот народ и 1170 години од создавањето на глаголицата. „Изложбата ‘Азбука и историја’ ги прикажува историските документи кои ја покажуваат тесната врска меѓу духовноста, верата и писменоста. Патот на буквите не е само пат на еден графички систем, туку на цела нова цивилизација која се создава во Бугарија – словенската цивилизација“, истакна Јотова во својот поздравен говор. Таа нагласи дека старобугарскиот јазик станал основа на писменоста кај словенските народи.

Потпретседателката рече дека по глаголицата, во бугарските земји се раѓа кирилицата, на која денес пишуваат над 250 милиони луѓе во светот и е една од трите официјално признати азбуки во Европската Унија.

Илијана Јотова се заблагодари за подготовката на бугарскиот штанд на Министерството за култура, на Асоцијацијата „Бугарска книга“ и на бугарската амбасада во Подгорица.

На форумот, бугарското учество е проследено со бројни културни настани, а Деновите на бугарската култура во Црна Гора се одржуваат под патронатот на потпретседателката.

Изложбата „Азбука и историја“, чиј автор е проф. Вася Велинова, е заеднички проект на Државниот културен институт при Министерството за надворешни работи, на Центарот за словенско-византиски истражувања „Иван Дујчев“ при Универзитетот „Св. Климент Охридски“ во Софија и на Фондацијата „Елена и Иван Дујчеви“. Со презентацијата на изложбата во Националната библиотека „Св. Кирил и Методиј“ на почетокот на април, беше поставен почетокот на прославите на 1170 години од создавањето на глаголицата.