Јотова повика на активно застапување на бугарската позиција за Северна Македонија

Претседателката Илијана Јотова повика на „активно застапување на сите нивоа на бугарската позиција за Северна Македонија“, јавува БГНЕС.

Таа одржа средба со бугарски европратеници, на која тие ѝ се пожалиле дека „не ја чувствуваат потребната поддршка од државата во застапувањето на бугарската национална позиција и констатираат пасивност од страна на некои институции“.

Повод за средбата во „Дондуков“ 2 е подготовката и претстојното гласање во јуни во Европскиот парламент на годишниот извештај за напредокот на Република Северна Македонија на нејзиниот пат кон Европската унија, подготвен од Томас Вајц. Во разговорот биле разгледани обидите на Северна Македонија да измени елементи од усвоената преговарачка рамка, кои се спротивни на европскиот консензус од 2022 година. Дискутирана била и опасноста од промена на начинот на гласање при прием на нови држави во Европската унија – со квалификувано, наместо со едногласно мнозинство.

БГНЕС потсетува дека во 2022 година беше постигнат т.н. европски компромис, кој создаде рамка за евроинтеграцијата на Скопје. Бугарија направи значајни отстапки и со јасно изразена политичка волја и широк консензус повторно ја поддржа својата најблиска историски држава во регионот. На почетокот на месец март, известувачот за Северна Македонија, Томас Вајц, поднесе предлог-измена во својот последен извештај, со што го доведува во прашање вториот протокол кон Договорот со Бугарија, дел од преговарачката рамка на ЕУ. Во предлог-измената 108, Вајц, во име на групата на Зелените, предлага во текстот на идната резолуција да биде запишано дека Европскиот парламент „ја повикува правната служба на Советот итно да ги разјасни сите нејаснотии во врска со правниот статус на вториот билатерален протокол кон Договорот за добрососедство и пријателство меѓу двете земји во контекст на процесот на пристапување“.

Учесниците на денешната средба се категорични дека „Бугарија, со самодовербата на полноправна членка на Европската унија, треба да ја застапува својата силна позиција и да инсистира на исполнување од страна на Скопје на францускиот предлог од 2022 година, кој стана и општоевропска позиција за пристапувањето на Република Северна Македонија во ЕУ. За да започне преговори, Северна Македонија мора да ги исполни своите обврски, вклучително и внесувањето на Бугарите во својот Устав. Бугарија и Северна Македонија немаат билатерален проблем, западниот сосед треба да ги исполни европските критериуми за членство, од кои основен е заштитата на човековите права“, соопштија од бугарската претседателска институција.

На средбата бил потсетен и случајот со минатогодишниот извештај на Европскиот парламент за напредокот на Северна Македонија. Претседателката Јотова и европратениците ја истакнаа „потребата Бугарија да ја засили својата меѓународна активност за застапување на својата позиција“.