Јотова: Првиот мандат за составување влада ќе биде доделен на 7 мај

Претседателката на Република Бугарија Илијана Јотова даде изјава по одржаните политички консултации со претставници на парламентарните групи во 52-то Народно собрание. Шефицата на бугарската држава соопшти дека првиот мандат за составување влада ќе биде доделен на 7 мај во 17:00 часот, јавува БНТ.

„Сакам да им се заблагодарам на сите парламентарно претставени партии, на раководствата на парламентарните групи, на претставниците на политичката партија „Преродба“, што дојдоа денес и учествуваа во консултациите. Сите тие дојдоа не за да ја исполнат својата формална обврска, туку консултациите навистина беа многу содржајни и можам слободно да кажам пред вас дека сите дојдоа и со веќе подготвени законодавни програми. Така што се надеваме Народното собрание да започне со работа со полн интензитет уште следната недела.“

„Најважните приоритети се заеднички. Заедничко беше мислењето дека треба да се започне со буџет само за половина година, буџет кој треба да ја прекине инфлациската спирала, буџет кој треба да им помогне на најранливите и социјално загрозените. Истовремено сите ја изразија својата желба и уверување дека тоа нема да се случи по цена на зголемување на даноците и дека сите социјални плаќања ќе бидат реализирани како и досега.“

„Вториот приоритет несомнено е реформата во судскиот систем. Сакам да истакнам пред вас дека тука пристапите се различни, предлозите на парламентарните групи се различни, но заедничко е мислењето дека најважниот прв чекор ќе биде направен и тоа е смената на Високиот судски совет, избор на нови членови според многу јасни, транспарентни и недвосмислени критериуми.“

„Во однос на буџетот има и уште еден важен показател околу кој сите се обединија. Треба да го направиме и невозможното Бугарија да ги добие исплатите од Планот за закрепнување, бидејќи тоа ќе биде и најголемата гаранција дека буџетот ќе функционира и ќе биде обезбеден. Се надевам дека денешните ставови и гледишта ќе бидат добра основа за дискусија во Народното собрание во иднина, дека ќе имаме нормализирање на политичкиот дијалог, како во рамките на парламентот, така и меѓу одделните институции.“, изјави Илијана Јотова, претседателка на Република Бугарија.