Јотова: Расказите за слободна бугарска Добруџа не се само уште едни страници од историјата

Претседателката на Бугарија, Илијана Јотова, порача дека споменот за слободна бугарска Добруџа е дел од личната и семејната меморија на многу Бугари и се пренесува од генерација на генерација како повод за самодоверба и гордост.

Во поздравна порака до жителите на Добрич и до градоначалникот на градот по повод 110-годишнината од Добричката епопеја и 86-годишнината од потпишувањето на Крајовската спогодба, кои се одбележуваат денеска, 7 септември, Јотова истакнува дека патот на Добруџа кон слободата бил долг и тежок, соопшти прес-службата на шефот на државата,пренесува БНТ.

„Незаслужено долг беше патот кон слободата на овој убав бугарски крај. Судено му беше да претрпи тешки неправди и дури трипати да го дочека ослободувањето“, наведува Јотова.

Таа потсетува дека во деновите на Добричката епопеја бугарските војници се бореле за Добруџа, а на 7 септември 1940 година Јужна Добруџа и Добрич повторно станале дел од Бугарија.

„Крајовската спогодба засекогаш затвори една од најболните рани во секое бугарско срце и го обнови трајното пријателство меѓу бугарскиот и романскиот народ“, посочува претседателката.

Според Јотова, денес Бугарија не може да се замисли без „златна Добруџа“, каде што, како што наведува, се родила и зацврстила бугарската држава.

„Без чудесно убавите добруџански рамнини и нивната плодна црница. Без проникливоста на Јовков, без нежното слово на Дора Габе. Без сите вас – срдечните, трудољубиви и секогаш гостопримливи Добруџанци“, додава таа.

Јотова ги поврзува датумите 6 септември 1885 година и 7 септември 1940 година како симболи на бугарското национално обединување.

„6 септември 1885 и 7 септември 1940 година засекогаш ќе останат денови на бугарското обединување. Денови на восхит, правда и надеж. Два нераскинливо и неразделно испреплетени датуми, бидејќи го отелотворуваат најсветлиот бугарски идеал – единството и благосостојбата на целиот бугарски народ“, истакнува Јотова.

Таа повикува со благодарност да им се оддаде почит на предците кои, како што наведува, со храброст и разум ја бранеле иднината на Бугарија.