Јотова: Расте интересот за изучување на бугарскиот јазик кај бугарската заедница во Албанија

Расте интересот за изучување на бугарскиот јазик кај бугарската заедница во Албанија. Бугарското неделно училиште во Елбасан веќе е блиску до оние кои сакаат да учат. Младите кои завршиле високо образование во Бугарија се враќаат во родните места во Албанија како наставници во бугарските училишта, а од неодамна има и бугарско училиште во Либражд. Бугарскиот јазик отвора многу можности за развој. Ова го изјави потпретседателката на Бугариja Илијана Јотова во Елбасан, каде ја отвори новата учебна година во бугарското неделно училиште во Елбасан, кон друштвото „Бугари во Албанија“. За активната и патриотска дејност Јотова на друштвото му ја додели почесната плакета на потпретседателот, а на училиштето му подари учебни помагала и книги од бугарски класици, соопшти прес-службата на бугарскиот претседател, пренесува БГНЕС.

„Ви благодариме за напорите да го привлечете интересот на децата да доаѓаат во бугарското училиште за време на викендите. Ги учите децата да ја запознаат и да ја сакаат Бугарија, да си ги знаат корените. Идентитетот не е застарен концепт во современиот свет. Колку повеќе ја знаете својата историја, толку подобро можете да ги браните вашите интереси“, со овие зборови потпретседателката Јотова и се обрати на наставниците. Таа ги увери дека ја имаат целосната поддршка на бугарската држава за развојот на бугарските неделни училишта.

Посетата на Јотова на Албанија се одвива неколку дена пред националниот попис на населението – прв по официјалното признавање на бугарското национално малцинство во земјата. Потпретседателката Јотова им се заблагодари на бугарските друштва за активната информативна кампања, особено во тешко достапните области. Таа ги повика претставниците на бугарската заедница без страв да се идентификуваат како Бугари. „Добиваме доста сигнали за притисок од емисари на други етнички групи врз Бугарите да не го објавуваат својот идентитет. Ова е кампања недостојна за 21 век. Но, имам уверување од албанските власти дека пописот ќе се спроведе транспарентно, со почитување на правата на сите етнички заедници“, посочи потпретседателката. Таа посочи дека од активноста на Бугарите зависи да го заштитат својот малцински статус со сите права што им ги дава албанската држава.

Илијана Јотова разговараше и со регионалната гувернерка на Елбасан Мајлинда Пјериу. Двете разговараа за повеќе можности за зајакнување на билатералните контакти меѓу Бугарија и Албанија, особено во областа на образованието и културата. Нагласена е идејата за изучување на бугарскиот јазик на Универзитетот во Елбасан. Сега бугарскиот јазик се изучува на Универзитетот во Тирана.