Кина испраќа медицински експерти во Конго поради епидемијата на ебола

Кина испрати тим медицински експерти во Демократска Република Конго за да помогне во контролирањето на тековната епидемија на ебола, која Светската здравствена организација (СЗО) ја прогласи за меѓународна криза во јавното здравство.

Според кинеската државна агенција Ксинхуа, експертскиот тим го напушти Пекинг утрово и ќе соработува со кинескиот медицински персонал кој веќе е во Конго, како и со локалните здравствени и епидемиолошки служби.

Кинеските експерти, кои имаат искуство во справувањето со епидемии, ќе помагаат во превенцијата и лекувањето на еболата, обуката на здравствените работници и обезбедувањето поддршка на кинеските државјани и институциите кои работат во централноафриканската земја.

Мисијата има за цел да сподели експертиза и да му помогне на Конго да го зајакне својот капацитет за спречување, контрола и лекување на ебола.

Кинескиот медицински тим што веќе работи во Конго активираше итни мерки, вклучувајќи дополнителна обука на персоналот, вежби за подготвеност и координација на медицински материјали, додека продолжува да обезбедува здравствени услуги за локалното население и кинеските граѓани.

Според најновите податоци на СЗО објавени во петокот, најмалку 134 случаи на инфекција се потврдени во тековната епидемија во Конго и Уганда.

Досега се регистрирани 18 смртни исходи меѓу потврдените случаи.