Комисијата за прашања на изборите и именувањата утре продолжува со расправа за предлозите за уставни судии

Собраниската Комисија за прашања на изборите и именувањата денеска расправаше за предлогот јавниот обвинител Љубомир Јовески да биде уставен судија, а во претпладневниот дел од седницата, членовите на собраниската Комисија не дадоа поддршка универзитетскиот професор Саво Климовски да биде избран за уставен судија, како предлог на опозицијата. Расправата за тоа дали Јовески треба да биде уставен судија ќе продолжи утре во 10 часот.

Пратениците од опозицијата истакнаа дека секогаш кога СДСМ е на власт, Јовески напредува во кариерата, како и дека никој од владејачкото мнозинство кои се предлагачи не го образложи предлогот Јовески да биде уставен судија.

Комисискиот филтер не го поминаа кандидатите универзитетскиот професор Саво Климовски, Тодор Витларов, вработен во Вишото јавно обвинителство во Штип, судијата во пензија Бранко Секуловски, Воислав Димовски, доскорешен јавен обвинител од Основното јавно обвинителство во Охрид и судијката од Управниот суд, Весна Јовановска. Досега е одбиена и кандидатурата на универзитетската професорка Родна Живковска, која беше предложена од опозицијата.

Уставниот суд повеќе од една година работи во нецелосен состав. Од предвидените девет члена, на четворица им е истечен мандатот.