Лога оствари средба со заменик-шефот на Мисијата на Амбасадата на САД во Скопје, Ерик Мејер
Уставните измени, ветингот, Изборниот законик, борбата против криминалот и корупцијата, состојбата во затворите, унапредувањето на соработката во делот на реформите во правосудството, беа дел од темите на кои разговараа министерот за правда, Кренар Лога, и заменик-шефот на Мисијата на Амбасадата на САД во Скопје, Ерик Мејер.
Лога го информира Мејер дека очекува најдоцна до 10 април сите парламентарни партии, вклучувајќи ја и ВМРО-ДПМНЕ, да предложат свој член во работната група, која ќе ги подготвува уставните измени. Очекувањата се работната група официјално да се формира до средината на месецот.
Во однос на ветингот, Лога повтори дека процесот ќе може да се реализира само со јасна поддршка од САД и ЕУ.
Заменик-шефот на Мисијата на Амбасадата на САД, Ерик Мејер, беше информиран и за законите што се во собраниска процедура, новото законско решение за Академија за судии и јавни обвинители, со кој се предлага реорганизација на приемниот испит со цел подобро оспособување на кандидатите за успешно учество во обуките, редефинирање на начинот на полагање на завршниот испит врз основа на мерила и објективни критериуми за процена на знаењата на кандидатите. Се дискутира и за политички монтираните случаи и последните случувања во КПД „Идризово“ и другите затвори во државата.
Министерот за правда, Кренар Лога, потенцира дека САД се голем пријател и стратешки партнер на Македонија во сите демократски процеси. Договорено е соработката да се интензивира во наредниот период.
