МАКЕДОНИЈА НАВИВА ПО 25 ГОДИНИ ПОВТОРНО НАШ ФИЛМ ВО ТРКА ЗА ОСКАР

//

Во театарот „Долби“ во Лос Анџелес ноќеска ќе бидат соопштени добитниците на Оскар за 2019 година во 24 категории, според гласањето на членовите на Американската филмска академија кое заврши во вторникот. „Медена земја“ е на чекор до Оскар во категориите документарец и интернационален филм.

Петчлената авторска екипа – режисерите Тамара Котевска и Љубомир Стефанов, снимателите Фејми Даут и Самир Љума, продуцентот и монтажер Атанас Георгиев и протагонистката во филмот – пчеларката Атиџе Муратова ќе бидат меѓу холивудската елита на свеченоста на 92-рото доделување на најпознатата филмска награда.

По 25 години нашата земја повторно има филм во трка за Оскар, првпат се случува да имаме две номинации, а првпат и во историјата на Американската академија документарен филм е номиниран во две категории.

За најдобар документарец конкуренти на нашиот филм му се британско-американската копродукција „За Сама“, сириско-данскиот „Пештерата“, бразилскиот „На работ на демократијата“ и американскиот „Американска фабрика“.

Во категоријата интернационален (странски/неанглиски) филм, покрај „Медена земја“ во трка за Оскар се и јужнокорејскиот „Паразит“, „Корпус Кристи“ од Полска, „Клетници“ од Франција и шпанскиот „Болка и слава“.

По објавата на номинациите пред четири недели, тимот на „Медена земја“ (Honeyland) им се заблагодари на членовите на Американската академија за тоа што филмот го нарекле материјал заслужен за Оскар.



Во меѓувреме снимателите Самир Љума и Фејми Даут ја добија наградата за најдобра кинематографија од Американското здружение на кинематографери, која првпат е доделена за категорија документарен филм. Во Лос Анџелес на 25 јануари наградата им ја врачи режисерот на филмот „Џокер“, Тод Филипс, кој рече дека ова е златно време за документарните филмови.

Во пресрет на 92-то доделување на наградите Оскар, авторската екипа на нашиот наградуван филм присуствуваше и на традиционалниот оскаровски ручек кој за сите номинирани секоја година го организира Американската филмска академија.

На овој значаен настан беа и најпознатите личности од светот на филмот – Квентин Тарантино, Роберт де Ниро, Ал Пачино, Леонардо ди Каприо, Бред Пит и др.

Оскаровската ноќ – меѓу најгламурозните настани на планетата што се пренесува во повеќе од 220 земји и територии во светот, по наше време ќе почне во 2 часот, а час и половина претходно ѕвездите ќе поминат на црвената патека пред театарот „Долби“.

Доделувањето на наградите ќе се пренесува онлајн на oscar.go.com, телевизискиот пренос кај нас ќе го има на ТВ Телма. Директно следење на шоуто по полноќ ќе организира и Младинскиот културен центар каде што претходно, од 22.30 часот, ќе биде прикажан „Медена земја“ и ќе настапи групата „Фолтин“ кои ја направија музиката за филмот. Влезниците се бесплатни и треба да се подигнат на билетарницата на МКЦ.

Претходна статија

МЕРИ ЛУ МАКДОНАЛД (ШИН ФЕЈН) „ПОЧНАВМЕ КОМУНИКАЦИЈА СО ОСТАНАТИТЕ ПАРТИИ ЗА СОСТАВ НА ВЛАДА БЕЗ ФИАНА ФАИЛ ИЛИ ФАИН ГАИЛ“

Следна статија

МИЗРАХИ ПО СУГЕСТИЈАТА НА ДИМИТРОВ ЗА НЕЈЗИНО РАЗРЕШУВАЊЕ: ТАБЛАТА Е НАСЛЕДЕНА НЕМА НОВА ИЛИ СТАРА

Најново од Вести