Меѓународниот фолклорен фестивал „Оро се вие“ ќе се одржи од 27 јули до 2 август во Босилеград

Меѓународниот фолклорен фестивал „Oро се вие“ годинава ќе се одржи во Босилеград од 27 јули до 2 август. Во текот на седумте фестивалски дена, градот ќе биде домаќин на изведувачи и љубители на традиционалниот фолклор од неколку балкански држави, јавува БТА.

Директорот на Центарот за култура „Босилеград“, Воислав Божилов, за локалните медиуми изјави дека програмата ќе го претстави богатството на балканските фолклорни традиции преку народни танци, песни, традиционални носии и обичаи. Според него, целта на манифестацијата е да го поттикне културниот обмен и да придонесе за зачувување на нематеријалното културно наследство на регионот.

Досега учество пријавиле 36 фолклорни ансамбли од Србија, Бугарија, Северна Македонија и Црна Гора. Меѓу учесниците ќе бидат и танцовите состави при Центарот за култура „Босилеград“ и Спортското друштво „Младост“.

Во подготовката и одржувањето на фестивалот учествуваат повеќе институции и општински претпријатија, меѓу кои Народната библиотека „Христо Ботев“, Туристичката организација на Општина Босилеград, јавните претпријатија „Чистота“ и „Услуга“, претпријатието за градежно земјиште и патишта, основното училиште, ученичкиот дом, Здравствениот дом, полициската станица, Спортското друштво „Младост“ и други организации.

Главен финансиски партнер на фестивалот е Општина Босилеград, со поддршка од Националниот совет на бугарското национално малцинство во Република Србија.

Фестивалот традиционално се организира секоја година од Општина Босилеград и Центарот за култура „Босилеград“.