Министерот за правда ќе ја предводи бугарската делегација на Света Гора за воведувањето на новиот игумен на Зографскиот манастир

Свечената богослужба и воведувањето на новоизбраниот игумен на Зографскиот манастир во Света Гора, јеромонахот Гаврил, ќе се одржи на 11 мај во соборниот храм на светиот манастир, јавува БГНЕС.

Во церемонијата ќе учествуваат духовното и административно раководство на монашката република, претставници на грчката држава, како и игумени и монаси од останатите светогорски манастири. Бугарската државна делегација ќе биде предводена од министерот за правда Георги Георгиев. Во нејзиниот состав ќе бидат и министерот за земјоделство и храна Георги Тахов, министерот за економија и индустрија Петар Дилов, министерот за животна средина и води Манол Генов и министерот за млади и спорт Иван Пешев.

Настанот е од исклучително духовно и културно значење за Бугарија и е поврзан со континуитетот и длабоките историски врски со светиот Зографски манастир – единственото целосно бугарско средиште на Света Гора, соопштија од владината прес-служба.

БГНЕС потсетува дека веста за изборот на новиот игумен на Зографскиот свети манастир на Атон стигна на Лазаровден. До неговиот избор се дошло по упокојувањето на архимандритот Амвросиј.

Новоизбраниот игумен јеромонах Гаврил е роден со светско име Георги Каратотев на 11 декември 1973 година во Софија. Во Зографскиот свети манастир доаѓа на 20 декември 1997 година, а монашкиот постриг го прима точно по една година – на 20 декември 1998 година.

Ракоположен е за јеромонах на 24 октомври 2003 година. Од почетокот на 2003 година, скоро непрекинато е прв епитроп на светиот манастир.

Зографскиот манастир е еден од најголемите на Света Гора и се наоѓа на 9-то место во хиерархијата на светогорските манастири.