Митов и Шекеринска рамо до рамо на меѓународната вежба „BULGARIA 2025“

Во Центарот за професионална обука на Граѓанска заштита во Монтана започна меѓународната вежба за управување со вонредни ситуации „BULGARIA 2025“. Станува збор за една од најголемите и најкомплексни НАТО-вежби за справување со кризни сценарија, чија подготовка траеше речиси една година, јавува БНР.

Организатори на вежбата се Главната дирекција „Противпожарна безбедност и заштита на населението“ на Бугарија, Евро-атлантскиот координациски центар за одговор при катастрофи (EADRCC) на НАТО и Центарот на НАТО за управување со кризи и реагирање при катастрофи (CMDR COE), со седиште во Софија.

Официјалното отворање се одржа на аеродромот во селото Ерден, каде што присуствуваа заменик-генералниот секретар на НАТО Радмила Шекеринска и министерот за внатрешни работи на Бугарија Даниел Митов.

„Огромен обем на работа ќе биде вложен во одговорот на кризи – ќе се симулира земјотрес, терористички напад, технолошки колапс, како и други сценарија за да се провери подготвеноста не само на НАТО, туку и на бугарските институции“, изјави Митов.

Вежбата ќе трае до 12 септември, а во неа учествуваат околу 1200 претставници од повеќе од 40 држави и организации. Целта е да се зајакне отпорноста и капацитетот за реагирање на кризи, но и да се изгради подготвеност на општеството во целина.

Главниот комесар Александар Џартов, директор на Главната дирекција „Противпожарна безбедност и заштита на населението“, нагласи дека се ангажирани над 500 лица:
„Ова е голем предизвик. Видовте колку голем камп е изграден, што бара постојана координација меѓу институциите – Гранична полиција, Пожарна служба, Национална полиција, како и локалната власт“.