МНИ упати сочувство до семеjството на Георги Лебамов и до раководството на МПО во САД и Канада
Македонскиот научен институт во Софија објави напис по повод смртта на Георги Лебамов, истакнат деец на македонско-бугарската емиграција и поранешен претседател на Македонската патриотска организација (МПО). По тој повод, раководството на Институтот изрази искрено сочувство до семејството на Лебамов, како и до раководството на МПО во САД и Канада.
На 9 февруари 2026 година, на 98-годишна возраст, во својот дом во Форт Вејн, САД, почина Георги (Џорџ) Лебамов (George Lebamoff), истакнат деец на македонско-бугарската емиграција во Северна Америка и поранешен претседател на Македонската патриотска организација во САД и Канада (МПО).
Георги Аргиров Лебамов е роден на 18 јули 1927 година во градот Форт Вејн, во родољубиво бугарско семејство. Неговиот татко Аргир Лебамов потекнува од селото Вишени, Костурско, а мајката Елена Качандонова од соседното село Бугарска Блаца. Фамилијата Лебамови, како и поголемиот дел од жителите на селото и на Костурско, активно учествувале во ВМОРО и во Илинденското востание, при што загинале неговиот прадедо Георги Лебамов и неговата баба Марија.
Неговиот чичко Атанас Лебамов бил активен деец на огранокот на Внатрешната организација во Цариград, а во 1905 година емигрирал во САД. Подоцна, во 1922 година, бил еден од основачите и прв благајник на МПО. Таткото Аргир Лебамов во 1907 година заминал кај постариот брат во Форт Вејн, а подоцна отпатувал во Пловдив, каде што се оженил со Елена Качандонова. Од нивниот брак, покрај Георги, се родиле и ќерката Марија (р. 1925) и синовите Иван (р. 1932) и Климент (р. 1939).
Г-дин Георги Лебамов завршил јавна администрација на колеџот во Хантингтон, а во почетокот на 1950-тите години служел во американската армија во Австрија. По враќањето во родниот град го продолжил семејниот бизнис со продавници за прехранбени производи и алкохол. Тој дал значителна поддршка за изборот на неговиот брат Иван Лебамов за градоначалник на Форт Вејн во 1972 година, кој подоцна, во периодот од 1983 до 1994 година, бил и претседател на МПО.
Георги Лебамов бил долгогодишен активен член на локалното и на централното раководство на МПО, а во периодот од 2006 до 2008 година бил и нејзин претседател. Тој има значаен придонес за стабилизирањето и продолжувањето на патриотските македонско-бугарски традиции на организацијата.
Во 1955 година Георги Лебамов стапил во брак со Роза Цигулова, по потекло од селото Бабчор, Костурско, со која имаат четири деца: Дебора (р. 1955), Ендру (р. 1961), Џон (р. 1962) и Том (р. 1965). Зад себе остави бројно потомство и роднини, меѓу кои и Себастијан Лебамов, внук на Иван Лебамов и сегашен член на Централниот комитет на МПО, како и спомените под наслов „Американскиот Македонец“, во кои накратко го раскажува својот живот и го опишува денационализаторскиот притисок врз него од страна на југословенските и постјугословенските власти во Скопје.
Раководството на Македонскиот научен институт упатува искрено сочувство до семејството на г-дин Георги Лебамов и до раководството на Македонската патриотска организација во САД и Канада.
