МНР на Бугарија: Обидите да се претстават во негативен контекст активностите за зближување на младите од Бугарија и РС Македонија се загрижувачки

Во врска со публикациите во Северна Македонија против „Мал битолски Монмартр“ и повиците на функционерите за поднесување жалби против организаторите на овој проект за развој на добрососедски односи, Министерството за надворешни работи на Република Бугарија го наведува следново:

„Министерството за надворешни работи ја изразува својата поддршка за сите иницијативи насочени кон зближување на младите од Бугарија и Северна Македонија преку културна и образовна размена.

Благодарение на Фондацијата „Бугарска памет“ и со поддршка на Министерството за надворешни работи на Република Бугарија, детското ликовно студио „Св. Св. Кирил и Методиј“ од градот Битола веќе една година реализира низа настани за талентирани деца од различни земји, од кои еден се одржа во Бугарија.

Обидите да се претстават ваквите позитивни иницијативи во негативен контекст во Северна Македонија предизвикуваат загриженост и збунетост. Нејасно е како, како проблем се претставува демонстрацијата на почит од страна на официјални претставници на бугарската држава кон талентот на младите уметници и читањето на светски реномираното ремек-дело на литературата за деца „Малиот принц“ од страна на шефот на државата на Република Бугарија.

Повикот за поплаки против група деца кои ја посетуваат Бугарија, за што постои експлицитна согласност од нивните родители, е обид за формирање негативно јавно мислење и ставови и претставува притисок врз оние локални граѓани и организации кои го поддржуваат пријателството меѓу двете земји.

Посебно вознемирува фактот, што тоа се случува во овој крајно одговорен момент, кога власта во Скопје се изјасни дека се стреми да создаде позитивна клима за усвојување на уставните измени. Градењето добрососедски односи со Бугарија подразбира радикално поинаков, европски пристап.

Ги повикуваме нашите пријатели во Скопје да ги насочат своите напори за обезбедување на европската иднина на Северна Македонија. Секоја провокација која има за цел да оправда одредени политички одлуки во претстојниот клучен период ја става во ризик оваа иднина. Сметаме на институциите во Северна Македонија јасно и јавно да ја осудат оваа и другите слични провокации“, стои во соопштението на МНР на Бугарија.