Над 150 издавачки куќи и богата литературна програма ги пречекуваат читателите на „Алеја на книгата – Софија“
Од 7 до 13 септември булеварот „Витоша“ и паркот пред Националниот дворец на културата во Софија ќе бидат домаќини на „Алеја на книгата – Софија“, со средби со писатели, промоции и литературни настани, јавува БГНЕС.
Манифестацијата, организирана од Асоцијацијата „Бугарска книга“ со поддршка на Општина Софија, ќе биде отворена секој ден од 10:00 до 20:00 часот. Официјалното отворање е на 7 септември во 17:30 часот.
Во програмата се вклучени промоции на книги, литературни разговори, потпишување книги, настани за деца и творечки иницијативи.
Меѓу авторите со кои публиката ќе може да се сретне се Георги Господинов, Здравка Евтимова, Захари Карабашлиев, Марија Донева, Иво Сиромахов, Катја Антонова, Николај Терзиски, Георги Константинов и Марија Касимова-Моасе.
Годинава „Алеја на книгата – Софија“ соработува и со граѓанскиот фестивал „Демократски мозаик“, посветен на активното граѓанско учество и размената на идеи.
