Народниот суд: злоделото со долгорочни последици за Бугарија

Денеска се навршуваат 81 година од почнувањето на Народниот суд во Бугарија. Суд што ја ликвидирал елитата на земјата, пишува БГНЕС. Народниот суд дејствувал во периодот од 20 декември 1944 година до крајот на април 1945 година.

Според достапните податоци, како резултат на неговата работа, земјата претрпела сериозни интелектуални и општествени последици, чии ефекти, како што се наведува, се чувствуваат и денес.

За обемот на репресиите се наведува дека за околу четири месеци биле организирани 135 масовни процеси низ целата земја. Уапсени биле над 28 илјади лица, а изречени се 9.155 пресуди, од кои 2.730 смртни казни. Над 1.300 пресуди биле доживотен затвор. Во овие бројки не се вклучени жртвите на насилствата непосредно по 9 септември 1944 година, кои се проценуваат на околу 20 илјади лица.

Како споредба се наведува Нирнбершкиот процес, на кој биле изречени 12 смртни пресуди за одговорните за започнувањето на Втората светска војна.

Нелегалниот карактер на т.н. Народен суд денес, според изворот, се признава и од дел од неговите поддржувачи, кои го објаснуваат со револуционерниот контекст на времето. Се наведува дека комунистичките власти ја искористиле меѓународната ситуација, поврзана со осудата на виновниците за Втората светска војна, за спроведување на пошироки репресии.

Народниот суд не дејствувал само преку 13 главни судски состави, туку, како што се наведува, постоеле над 100 состави кои заседавале во речиси сите окрузи, изрекувајќи пресуди и на лица кои немале значајна улога во власта.

Како врв на репресиите се наведува 1 февруари 1945 година, кога биле погубени регенти, министри и пратеници. Меѓу нив се споменува и светски познатиот хирург, проф. д-р Александар Станишев.

Во текстот се посочува дека Народниот суд бил противуставен орган и дека последиците од неговото дејствување и натаму се предмет на јавни и историски расправи.