Неделата на бугарската култура во Одеса ќе биде празник на единството и пријателството
Неделата на бугарската култура во украинскиот црноморски град Одеса ќе се претвори во вистински празник на единството, пријателството и заемното збогатување на традициите, изјавија на прес-конференција генералниот конзул на Бугарија во Одеса, Светослав Иванов, и директорот на Департаментот за меѓународна соработка, култура и маркетинг при Градскиот совет на Одеса, Иван Липтуга, јавува БНР.
Настанот ќе се одржи од 27 октомври до 1 ноември и е посветен на Денот на бесарабските Бугари – 29 октомври. Организатори на ова мултикултурно и меѓународно случување се Градскиот совет на Одеса, Генералното конзулатство на Бугарија во градот, Бугарската телеграфска агенција (БТА) и Одескиот градски музички театар „О. Салик“.
Богатата програма опфаќа културни и литературни средби, изложби и голем свечен концерт со настапи на бугарскиот народен пејач Илија Луков и бугарски ансамбли од Одеската област. Според Липтуга, настанот ќе биде симбол на пријателството меѓу двата народа.
Генералниот конзул Иванов истакна дека бугарското малцинство во Украина претставува жива врска што го зацврстува пријателството меѓу Украина и Бугарија. Тој додаде дека во рамките на Неделата се организираат и дополнителни концерти на Илија Луков во регионот – на 29 октомври во Тараклија (Молдавија), на 30 и 31 октомври во Болград и село Василевка, а кулминацијата ќе биде голем концерт во Одеса на 1 ноември.
„Иако руската агресија продолжува веќе четврта година и Украина минува низ многу тежок период, ние сме должни да покажеме дека животот продолжува,“ изјави Иванов.
