Никола Цолов- Бугарскиот лав, кој годинава ќе вози во Формула 3 и е на чекор од трките во Формула 1

Бугарскиот пилот Никола Цолов годинава ќе се натпреварува во новата сезона на Формула 3. Шампионатот се одржува паралелно со трките во Формула 1 – во ист викенд и на иста патека.

Патот на Никола Цолов до неговиот голем сон започнал кога имал девет години. Како дете, тој не знаел што му подготвува судбината. Знае само дека картингот е неговата најголема љубов. Денес го нарекуваат бугарскиот лав.

„Или ја заземаш позицијата или не завршуваш. Имаш една шанса и понекогаш има место за пола картинг, но поминуваш низ тревата со две гуми само за да успееш“, вели Формула 3 возачот и додава: „Едноставно треба да го направиш тоа во моментов, дури и ако се плашиш, си велиш – готово го правам“.

Приказната за Никола Цолов започнува пред неколку години. Кога имал девет години, за првпат стапнал на патеката и се качил на картинг. Неговото срце останало таму.

„Се чувствуваш одлично. Возиш нешто што се движи многу брзо со твоите раце и контролираш сè“, се сеќава тој.

Неговиот татко одиграл клучна улога во разгорувањето на неговата страст за спортот. Кога имал само девет години, се издвоил од своите врсници на Државното првенство. Ниту во првите години во спортот, второто место не било опција за Никола.

Првиот што го забележал неговиот талент е поранешниот автомобилски тркач Николај Варбицалиев. Денес тој е управител на картинг патеката каде Никола се натпреварува во дисциплината. Варбицалиев тврди дека штом еднаш бензинот влезе во крвта, тој никогаш не излегува од таму.

„Моментот кога знаев дека Никола е навистина посебен беше првиот пат кога тој имаше можност да вози картинг за возрасни, што може да го возат возачи со одредена висина и возраст. Реално, работите што тој ги правеше возејќи ги помоќните картинг возила, се работи што со години ги учиме луѓето да ги прават“, вели поранешниот возач.

Потенцијалот на младиот бугарски возач не останал незабележан од легендата на Формула 1, Фернандо Алонсо. Тој останал фасциниран од брзината на Бугаринот. Неговиот тим исто така е фасциниран од Никола во неговата дебитантска сезона во Формула 4.

Минатата година Цолов ја освои титулата во Формула 4 со 13 победи од 21 старт. Собра рекордни 400 поени. И во речиси 62 проценти од сите трки на кои стартувал, завршил прв. Во вечното рангирање на Формула 4, Никола е втор – по Холанѓанецот Ричард Фершур.

Брзината и карактерот на Никола му го донеле прекарот „Бугарскиот лав“. Неговиот шлем е во боите на бугарското знаме. А неговиот тркачки број со кој ја освоил титулата во Формула 4 е 12.

Новата сезона за Никола значи нов почеток. Во март, младиот пилот се враќа на трките, но овој пат со нов тим и како возач на Формула 3. А со тоа, сонот за Формула 1 сега е чекор поблиску.