Носителот на „Икар“ Владимир Пенев: Имаме многу повеќе причини да се сакаме, отколку да се мразиме и завидуваме

Националните награди за сценски уметности „Икар“ беа доделени по 49-ти пат. На свеченоста во Народниот театар „Иван Вазов“, чиј организатор е Сојузот на артистите во нашата земја беа доделени 25 статуетки.

Антон Радичев е награден за исклучителен придонес за бугарскиот театар. „Орфеј“ во Народниот театар е прогласена за најдобра претстава за изминатата година. Мотото на церемонијата оваа година беше „Изберете го театарот!

Светлана Јанчева освои „Икар“ за главна женска улога за Вини во „О, среќни денови“ од Бекет во театарската работилница „Сфумато“. Марија Бакалова – единствената бугарска актерка номинирана за „Оскар“, му ја врачи статуетката за главна машка улога на Владимир Пенев за Поп Крстјо во „Велигденско вино“ во Народниот театар:

“Имаме многу повеќе причини да се сакаме, отколку да се мразиме и да си завидуваме. Затоа ве повикувам – кажувајте кога ќе видите нешто убаво! Не пропуштајте прилика да кажете: Те сакам! Дури и на човек кој не ви е многу симпатичен“, рече Владимир Пенев.

Наградата за режија отиде во Народниот театар. Ја доби словенечкиот режисер Јернеј Лоренци за претставата „Орфеј“. Статуетката „Икар“ за чест и достоинство и беше доделена на Марија Стефанова (највозрасната активна актерка кај нас во моментов), Теодосиј Спасов за светската турнеја беше награден од сојузот на музичките артисти, а Антон Радичев за исклучителен придонес во Бугарскиот театар:

„Сакам да му се заблагодарам на Бога што се родив на оваа Земја, на сцената на овој театар сум половина век. Искрено и човечки ви благодарам“, рече Антон Радичев.

Уметничкото семејство Јана Титова и Александар Алексиев, кои излегоа на сцената со своите деца за да врачат една од наградите, носеа црни маици со натпис „Морфов“, а Алексиев изрази жалење што претседателот не е во салата за да му каже: “Слава на Украина! Да живее Бугарија!”