Пицула: ЕУ мора да престане да го фаворизира Вучиќ
Известувачот на Европскиот парламент за Црна Гора, Тонино Пицула, изјави дека резолуцијата на Европскиот парламент со која се бара санкции против Србија доколку се докаже поврзаноста на Белград со терористичкиот напад во Банска на 24 септември е пресвртница во однос на односите на ЕУ со Србија, пренесува БГНЕС.
„Резолуцијата што Европскиот парламент ја одобри минатата недела со големо мнозинство е на некој начин пресвртна во однос на односите со Србија, во однос на дијалогот олеснет и поддржан од Европската унија, бидејќи терористичката инвазија на паравоените групи во северно Косово покажа дека дијалогот има многу ограничен опсег“, рече Пицула, цитиран од црногорското издание Победа.
Според него, режимот на Александар Вучиќ во Србија „во никој случај нема да се откаже од контролата над сите овие територии кои граничат со Србија и каде што живее српското население“.
Европратеникот нагласи дека српскиот претседател ќе се обиде да ја искористи резолуцијата одобрена од ЕП за свои политички интереси.
„Преку оваа резолуција испративме многу јасна порака не само до властите во Белград, туку и до институциите во Брисел конечно да престанат со политиката на фаворизирање на Александар Вучиќ“, додаде тој.
Притоа, Пицула зборува и за политичката ситуација во Црна Гора, како и за улогата на СПЦ во земјата во формирањето на новата влада, велејќи дека Црквата „е надвладина политичка организација“.
Таа отворено се меша во внатрешните работи на Црна Гора, на секој начин се обидува да го избрише црногорскиот идентитет“, нагласи европратеникот.
„Според мислењето на Српската православна црква, црногорскиот е само подваријанта, регионална варијанта на главниот, фундаментален српски идентитет на Црна Гора, а високите членови на СПЦ не го кријат овој факт“, нагласи Пицула.
