Пловдивскиот универзитет за втора година по ред организира онлајн курсеви за наставници по бугарски јазик во странство

Одделот за јазична и специјализирана подготовка на странски студенти при Пловдивскиот универзитет „Паисиј Хилендарски“ втора година по ред организира онлајн курсеви за наставници по бугарски јазик и литература во бугарските училишта во странство, јавува БНР. Обуката ќе се одвива во учебната 2025 – 2026 година, во време погодно за учесниците, а предавачи ќе бидат утврдени специјалисти од универзитетот.

Се нудат две квалификациски програми – за наставници со педагошка квалификација (200 академски часа) и за наставници без педагошка правоспособност (250 академски часа). Вториот курс содржи дополнителен педагошки модул по предучилишна и училишна педагогија, психологија на развојот, педагошка психологија и дидактика, насочен кон развивање на наставнички умеења и компетенции.

Наставните дисциплини ги опфаќаат сите возрасни групи – од предучилишно до гимназиско образование – и се приспособени на специфичностите на предавање во средина каде што бугарскиот не е мајчин јазик. По завршување на секоја дисциплина, курсистите полагаат испит или презентираат индивидуален проект.

Успешно завршените курсеви носат свидетелство за професионална квалификација. Регистрацијата се врши преку електронски формулар на адресата https://forms.gle/Lzsf9zCHPZ6s89yH6, а крајниот рок за пријавување е 15 септември 2025 година.