|

По два пропаднати огласа, сега има пријавени приватни превозници за вршење јавен превоз

По два пропаднати огласа за приватни превозници во Град Скопје, овој пат има пријавени. Ова го потврди и скопската градоначалничка Данела Арсовска. Таа не кажа број на пријавени, туку посочи дека ќе чекаат до истекот на рокот за да видат колку вкупно апликации ќе има.

„Да, тие се пријавија. Ќе го причекаме и последниот рок, што е позитивна пракса, за да пристигнат ако има по пошта некои дополнителни апликации и во согласност со тоа од наредната недела комисијата треба да има одлука“, рече Арсовска.

Посочи дека добредојдени да вршат јавен превоз со приватни автобуси се сите превозници што имаат чесни намери и ќе работат во прилог на граѓаните.

„Она што верувам дека самите успеавте да видите во јавноста, дека ги повикавме сите што сакаат чесно и одговорно да си ја вршат оваа дејност, да се пријават на овој оглас со новото координативно тело на превозниците. Тие имаат чесни намери, навистина се заинтересирани да продолжат да работат, да работат како што се бара, да биде во интерес на граѓаните и да биде овозможена најдобрата можна услуга. Второ, разговаравме за адаптирање и приспособување кон стандардите важни за граѓаните за подобрување на состојбите во животната средина (за обновување на возниот парк)“, додаде Арсовска.

На почетокот на март приватните превозници рекоа дека се враќаат на работа од идниот месец. Долгот што ЈСП го има кон нив се става на страна и ќе се решава тековно.



Слични Објави