Полскиот амбасадор во Бугарија: Русија е ослабена, но провокациите ќе продолжат – нападот со дронови не беше случајност

Вистинска војна нема да започне, но провокации ќе има и понатаму. Иако Русија во моментот е значително ослабена, опасноста од нови напади не е исчезната. Ова го изјави амбасадорот на Полска во Бугарија, Мачјеј Шимански, во интервју за „Нова телевизија“, пренесува Актуално.

Според него, НАТО има огромна предност по копно и воздух, но малите дронови и понатаму претставуваат сериозен предизвик. Тој нагласи дека неодамнешниот инцидент со руски дронови во полскиот воздушен простор не е случајност, туку сериозна провокација. „Овие дронови не носеа експлозиви, но беа снабдени со големи резервоари за гориво – со јасна цел да стигнат подалеку“, објасни Шимански.

Амбасадорот истакна дека поддршката од сојузниците на НАТО била клучна за неутрализирањето на заканата. Нидерландските борбени авиони имале водечка улога во соборувањето на руските дронови, а во операцијата помогнале и Франција, Италија и Германија.

Во врска со позицијата на американскиот претседател Доналд Трамп, Шимански рече: „Трамп се обидува да ја смири Русија, верувајќи дека Путин ќе покаже разум“. Тој додаде дека Европа реагирала предоцна на агресивното однесување на Москва. „Требаше да се преземат посериозни мерки уште пред години. Сега ја плаќаме цената – висока, и тоа не само финансиска“, нагласи тој, мислејќи на привременото затворање на варшавскиот аеродром и зголемените трошоци за одбранбени активности.

Шимански откри дека Полска активно работи со Украина на подобрување на системите за заштита од дронови. Тој потсети дека полскиот министер за надворешни работи, Радослав Сикорски, неодамна бил во Киев, каде што финализирал договор за размена на искуства и технологии. „Месеци наназад работиме во оваа насока“, нагласи амбасадорот.