Помпео: Трамп не смее да го награди Путин за агресијата во Украина
Поранешниот американски државен секретар Мајк Помпео во статија за Фајненшл тајмс предупредува дека претседателот Доналд Трамп не смее да направи отстапки кон Москва со прифаќање на нејзините територијални освојувања во Украина, пренесува БНР.
„Трамп не треба да го награди Путин за неговата агресија во Украина. Прифаќањето на незаконското заграбување на земји во Донецк и Луганск би било сигнал за диктаторите насекаде дека насилството се исплати“, пишува Помпео.
Тој посочува дека извонредните средби што Трамп ги одржал во последната недела со Владимир Путин, украинскиот претседател Володимир Зеленски и клучни европски лидери ја демонстрираат неговата силна посветеност кон постигнување траен мир по повеќе од три и пол години крвопролевање.
„Претседателот ја мобилизира американската моќ за да изгради коалиција неопходна за иднината на Украина – токму од тој инструмент Путин се плаши. Како некој што седел спроти него како државен секретар, знам дека Путин реагира единствено на сила. Трамп ја разбира таа реалност“, наведува Помпео.
Тој ја истакнува и одлуката на сојузниците во НАТО да ги зголемат трошоците за одбрана на 5 отсто од БДП како доказ дека пристапот на Трамп дава резултати таму каде што „дипломатските финеси“ пропаѓаат.
Помпео предупредува дека евентуално прифаќање на руското барање Украина да ги предаде источните делови на Донецк и Луганск би било „стратешка катастрофа“ за земјата и политичка смрт за владата во Киев.
„Предавањето на контролата врз индустриското срце на Украина и клучниот одбранбен појас против Русија, за чија одбрана загинаа илјадници Украинци, би го попречило закрепнувањето на земјата и би ѝ овозможило на Москва да го доврши освојувањето. Поважно, наградувањето на агресијата на Путин со територијални придобивки би испратило порака до секој диктатор во светот дека насилството вреди“, заклучува Помпео.
