Поранешниот министер за надворешни работи на Бугарија Николај Младенов ќе биде генерален директор на Советот за мир во Газа

Израелскиот премиер Бенјамин Нетанјаху потврди дека Бугаринот Николај Младенов ќе биде генерален директор на Советот за мир во Газа, претставен од американскиот претседател Доналд Трамп минатата есен, јави Асошиетед прес, пренесува Радио Бугарија.

Младенов веќе се сретна со Нетанјаху и со израелскиот претседател Ицхак Херцог во Ерусалим. На 9 јануари му претстои средба во Рамала со Хусеин ал Шеик, заменик на претседателот на Палестинската автономија Махмуд Абас, информираат израелските медиуми.

Николај Младенов е поранешен прв дипломат на Бугарија, а има извршувано и низа високи функции во меѓународни организации. Од 2013 до 2020 година бил претставник на Обединетите нации на Блискиот Исток.

Според планот на Трамп, Советот за мир во Газа треба да го контролира новото технократско палестинско владеење, разоружувањето на „Хамас“, распоредувањето на меѓународните безбедносни сили, дополнителното повлекување на израелските трупи и обновата на Појасот Газа.