(Видео) Екатерина Лазаревска: Треба да веруваме во човештвото, колку и тоа да ни изгледа тешко во одредени моменти

Луѓето почесто треба да се потсетуваат на суштинските нешта во животот и да се обидуваат да веруваат во човештвото, колку и тоа да ни изгледа тешко во одредени моменти. Ова го изјави во интервју за БГНЕС актерката Екатерина Лазаревска.

Носителката на главната улога во серијата „Мамник“, која е родум од Северна Македонија, сподели дека образованието во НАТФИЗ во голема мера го оформило нејзиниот карактер и нејзините перцепции за актерската професија.

Како и повеќето млади луѓе, Лазаревска се интересира за човечките нешта: „Ме интересира да се чувствувам добро, да бидам меѓу луѓето што ги сакам, меѓу семејството и пријателите. Ме интересира и професијата и секоја нова работа што таа ја носи“.

Актерката ништо не им споделила на своите пријатели од Северна Македонија за „Мамник“. Дел од нив специјално дошле на гала-премиерата за да ја гледаат, а допрва ќе дознае што мислат. „Многу ми е драго што се тука. Тоа многу ретко се случува. Поради начинот на живот и несовпаѓањето на нашите распореди, многу ретко ни се случува да бидеме на исто место во исто време. Особено за вакви специјални моменти“, изјави Лазаревска.

Криминалната мистерија „Мамник“ е создадена според романот на Васил Попов. Премиерата на првата епизода се одржа на 8 јануари во Софија.

Во 12-те епизоди гледачите ќе ја следат истрагата на полицајката Божана Горнева (Екатерина Лазаревска), нејзиниот колега Митко (Маријан Стефанов) и локалниот полицаец Камен (Јордан Р’син), кои се соочуваат со серија мистериозни убиства и легендата за Мамникот – демонска птица од бугарскиот фолклор.

Меѓу актерите се и Гринго – Богдан Григоров, Владимир Пенев, Ели Скорчева, Атанас Атанасов и други. Режисер и креативен продуцент е Виктор Божинов, директор на фотографија е Антон Бакарски, а сценаристи се Владислав Тинчев и Димитар Христов – Кевин. Серијата е реализирана со поддршка на Националниот филмски центар, соопштуваат од екипата.