Потпретседателка на Европската комисија и еврокомесарка за технолошки суверенитет, безбедност и демократија Виркунен: Бугарија има важна улога во развојот на вештачката интелигенција во Европа

Бугарија има значителен потенцијал кај стартап-компаниите, а инвестицијата во фабриката за вештачка интелигенција BRAIN++ во „Софија Тех парк“ ќе придонесе за зголемување на европскиот пресметковен капацитет. Ова го изјави извршната потпретседателка на Европската комисија и еврокомесарка за технолошки суверенитет, безбедност и демократија, Хена Виркунен, во интервју за „24 часа“.

По разговорите со бугарскиот министер за иновации Иван Василев и претставници на технолошкиот сектор, Виркунен посочи дека главните теми биле конкурентноста, инвестициите и пристапот на компаниите до финансирање и пазари.

„Бугарија игра многу важна улога во ова, бидејќи тука има и многу голем потенцијал кај стартап-компаниите“, рече таа.

Според Виркунен, приоритет за Бугарија е завршувањето на фабриката за вештачка интелигенција, која ќе им овозможи и на стартапите да обучуваат системи со вештачка интелигенција. Во иднина, бугарските компании ќе можат да учествуваат и во европските проекти за гигафабрики.

Таа оцени дека недостигот од пресметковен капацитет е пречка за развојот на секторот. Американските и кинеските компании имаат силни позиции со напредните модели, но европските компании почнуваат да го намалуваат заостанувањето, додаде Виркунен, посочувајќи го новиот модел на Mistral AI.

„За Европа е многу важно да располага и со сопствени основни модели на вештачка интелигенција, за да не зависиме само од американски или кинески компании“, нагласи таа.

Виркунен посочи дека Европската комисија работи со земјите членки на намалување на административните пречки, подобро искористување на единствениот пазар и полесен пристап до финансирање. Во тој контекст го истакна и европскиот фонд за раст на компаниите, за кој е надлежна еврокомесарката Екатерина Захариева.

„Често токму тоа се предизвиците за помалите компании — преголемиот административен товар и бирократијата, како и тешкотиите со кои понекогаш се соочуваат при обезбедувањето финансирање“, рече Виркунен.

Одговарајќи на критиките дека Европа е поуспешна во регулирањето отколку во создавањето вештачка интелигенција, таа нагласи дека Комисијата настојува да го олесни работењето на компаниите, истовремено задржувајќи ги правилата за безбедност.

„Не сакаме да создаваме пречки за компаниите“, изјави Виркунен, додавајќи дека Актот за вештачка интелигенција се применува на начин што ги поддржува иновациите.

Според неа, моќните модели треба да бидат тестирани пред да се пуштат на пазарот и постојано да се следат по нивното воведување. ЕУ истовремено сака да ги поддржи индустријата и јавниот сектор во користењето вештачка интелигенција за поголема продуктивност и создавање нови услуги и производи.